عماد رشاد يكتب :كيف تصبح عضو مجلس نواب في 3 شهور

المظاهر خداعة ، وانت سيد من يرسم ذلك ، عايز تبقى عضو مجلس نواب فى اقل فترة زمنية ممكنة ، اتبع الخطوات التالية ونفذها حرفيا ، يتحقق لك ماتريد ،

١ – فصل 5 جلبيات بلدي صوف غاليين بالجلبيات البيضة اللي تحتيهم وشال كشمير محترم

٢ – تروح أي عزا في الدايرة وتدخل من قدام حتي لو في قرايبك من هو أكبر منك سنا ومقاما

٣ – تروح أي فرح دعيت إليه أم لم تدعي وتسلم علي كل الفرح اهل العريس والعروسة والمدعويين

٤ – تتصرف ولو حتي هتستلف وتدبح عجل كل وتوزعه علي كل الناس الباينة اللي ممكن تحشدلك أصوات

٥ – تسمع عن أي صلح تروح تحشر نفسك في اللمسات الأخيرة وتقعد من قدام

٦ – تسمع عن أي ست غضبانة تروح لجوزها وتسمع منه وتاخد حد من أهله وتصالحهم

٧ – تنزل يفط كتير في العيد ودخول رمضان وتحط صورتك وتهنئ الامة الاسلامية وفي الاعياد المسيحية تهنئ الاخوة الأقباط

٨ – اوعي تقرا سياسة عشان مش هتفهم حاجه واذا حد من المواطنين سألك أي سؤال سياسي ترد بإجابة واحدة ربنا يصلح الحال

٩ – تمشي مع التيار.
١٠ – تسمع عن اي مدرسة هتتبني او اي شارع هيترصف تروح كاتب طلب وموديه الابنية التعليمية او مجلس المدينة وتدَّعي كذبا وزورا وبهتانا انك انت اللي عملته

١١- أي افتتاح لأي مدرسة أو طريق أو شارع او مصنع علي طول تروح رايح وتحشر نفسك وتتصور

١٢ – أي مسجد هيتبني تروح وتدفع تبرع مالوش لزمة عشان تحضر افتتاح المسجد كإنك إنت اللي بنيته

١٣ – أي فرصة للخطابة في أي مناسبة امسك الميكروفون وخبط بأي كلام ..

١٤ – تنتقد المستشفي بمناسبة ومن غير مناسبة
١٥ – تصاحب الظباط وأمناء الشرطة عشان لو حد اتمسك
تروح تطلعه من المركز

١٦ – لو الجلبيات قدمو فصل جلبيتين تانيين
١٧ – عربيتك لازم تكون كبيرة ومحترمة ولو ماعندكش استلف عربية من حد تبعك عشان لما تروح عزا او فرح

١٨ – ماتمشيش من غير ٥ او ٦ رجال تنقيهم محترمين حواليك يعملولك جو وكده
١٩- كل بلد تروحها تقوللهم ايه اللي ناقصكم ؟؟ يعني قال انت اللي ها تكمله

٢٠ – اي حد بيتفزلك وبيسأل أسئلة كتيرة وصعبة صاحبه بسرعه وخد تليفونه وقوله انت عجبتني عشان مخك حلو ونور عشان ينشغل بكلامك ويبطل يسأل ..

21- لو راكب عربيتك الفخمه وعيل صغير نادي عليك انزل فوراً سلم عليه قدام الناس وخط اللقطه عشان تبقى متواضع وخلوق ..

22 – ودايما لو بتحل مشكله بين رجالة خلي صوتك يبقي أعلي من كل الموجودين للفت النظر والانتباه قول نويت وتوكلت على الله وربنا مع الشعب الغلبان.