داليا زردق تكتب : مطب صناعي
خليك زي عربيتك… لو ماشي في طريق سريع ، و قابلك فجأة مطب ، بتتخض وتتلخبط صحيح ، بس مش بتركن و لا تنزل تقعد جنب المطب ، بتنساه تماما و تكمل طريقك ، مينفعش تبطأ ، وراك عربيات كتير ، مينفعش تقف ، مينفعش تبطل تسوق تاني عشان خايف يقابلك مطبات تاني !
الطريق مكمل كده كده مهما حصل ، وحتلاقي مطبات كل شوية ، لازم تعديها و تتجاهل إنها لخبطتك شوية ،
خليك ماشي منور طريقك بنورك أوعي تطفيه، هو بيرشدك عشان متخبطش، بيقودك للمكان الصح عشان متلبسش، خليك حاطط رجلك بحذر عند الفرامل ، عشان لو حسيت بخطر تقف !
أوعي تكمل لو شايف الطريق في حاجة حتأذيك، أوعي تجري علي مكان حيوجعك بعد كده !
خليك ملتزم بالإشارات اللي حواليك ، بلاش تتجاهلها،
إعرف إمتي تقف تماما و تنتظر بلاش تغامر ، بلاش تضر نفسك و اللي حواليك،
إعرف إمتي لازم تمشي، بلاش تعطل حالك و تضيع وقتك لو الطريق مفتوح ادامك،
إستعد دايما ، مينفعش تنام و تغمض و إنت في طريقك ،
لازم تكون واعي كويس لكل خطواتك ، حتستريح بس بعد ما توصل ، حترتاح بعد ما تتأكد إنك وصلت لوجهتك و مش تائه عالطريق،
و حتي لو تهت ، و ضاعت منك الإشارات، إبدأ تاني و خد طريق موازي حيوصلك برده لمكانك،
المهم تكون مصمم توصل ،
تكون عامل حسابك ، معك كل اللي يلزمك في مشوارك ،
بلاش و إنت ماشي تدوس علي حد ، و لا تضيع حد مالوش ذنب ،
خلي اللي عايز يعدي يعدي ، و اللي عايز يشاور يشاور ، متقفش الا لو كنت متأكد من اللحظة دي و القرار ده ،
حتوصل بالسلامة لو بدأت رحلتك و طريقك و إنت ناوي كل خير و مصمم عالنجاح..
Yoast
