منوعات

الشاعرة امل احمد تكتب : العرافة

قعدت العرافه جنبي ع الصبح تقولي …
مش هخبي عليكي حاجه …رغم أن ابتسامتك منوره وشك
بس قلبت الفنجان فوق الطبق وقالت ….كل حاجه مستخبيه هتبان..

ضحكت وقلت لها حياتي اللي فاتت كتبت فيها قصه …وأشعار …
ماعنديش شيء انكسف منه ولا في اسرار

ابتسمت وقالت ياصبيه …انتي لسه شابه برضا ربك قويه
استني بس ….هقولك قرائه الفنجان لها حكم واقوال
قمت فتحت صوت ثومه وهيه بتغني ….الف ليله وليله
سمعت صوت ضحكتها عاليه …التفت لها وسالت مالك ياغاليه..
قالت لي عوزه راي شغلي للصبر حدود …دي لايقه.ع قعدتنا

ومسكت الفنجان وفضلت ساكته حبه …..
واتعدلت ع الكنبه وقالت لي ليه يابنتي كل ده
ليه جبال أحزانك مايله.كده معقوله في حد يتحمل كده
طيب انتي ليه خايفه كده من ايه قراراتك متردده
يااااااه.قلبي وجعني عليكي ….طب مش كان بايديكي
ازاي تمشي ف طريق العشق من يومها …حد غصب عليكي
يومك تايها.. احلامك لسه ضايعه …وافكارك مش مترتبه
في حد لسه عنده وفاء واخلاص كده ….لا لا مش بالشكل ده

زمنك.ده عدااا.وفات ….وتوته توته كان ياماكان وتنتهي الحكايات …أصحي بجد محدش له امان

طب سكه السفر فوق جبينك ومرسومه ع كفك ….بس لسه ماجاش الاوان
جهزتي شنطه سفرك ليه ….والتذكره والوقت مش مكتوب …
طب انتي عاوزه تمشي من غير محبوب .
خايفه اوضح لك اكتر تتبدل ضحكتك لدمعه

قبل عيد ميلادك تنطفي فرحتك وماتقيدي شمعه
بس خدي بالك …..اللي جاي بأمر ربنا …
احنا بنقرا اللي قدامنا …..ومش هقول أنه بيتحقق
كذب المنجمون وان كان ….والا ….بس انصحك شوفي طريقك …
كملي طموحك …وان اتقفل مليون باب ربنا فاتح لك أبوابه
ماتساليش ع حد باعك ….حتي اللي منك ….
خدي ربنا خير دليلك … واللي مكتوب قسمتك ونصيبك

وقبل مااقوم نفسي بس اقولك حاجه
قلبي بينزف عليكي بجد مستحيل انك تتحملي كل ده استحاله …
لكن كل اللي هقدمه ليكي بعد ماامشي ….
هفضل ادعي لك ياغاليه ….
جواك حب يكفي العالم بطوله ….بس اللي خانوكي كتير

كسروا خاطرك …خذلوكي ….وجرحوكي. ..وانتي بتتعاملي بضمير
كل ده عند ربنا جزاءك ….واوعي تندمي ..ماتدعيش ع اللي اذاكي ….فوضي امرك قوي

بس في ناس كانوا جنبك بعد ربنا سندك ….هما دول سر دعوات امك وابوكي …ليوم الدين بيحبوكي

اطمني عوض ربنا جاي لك قريب ….يمكن تقابلي قلب طيب
وان كان ختامك كده …..انتي كفايه انك كملتي حياتك
من غير خبث ولا غدر ….انتي اخترتي تكون

اجمل امراه يصفونها ….ذات القلب الطيب
ومشيت بسرعه وهيه بتبكي …..
خساره ملاحقتها…
عمري مااتصورت اني اكون سبب دموع حد ابدا

ويارب ليه خلتني اكون سبب حزن قلب.
يااااارب خفف عني …..وطمني عنها
يوم قراءه فنجاني

زر الذهاب إلى الأعلى