هبه حسن تكتب : شبه انفصام

استاذ كبير
ف الجرح وف بيع الضمير
والمستحيل انك تكون عاشق وريد
هو من امتي الغرور يعرف يحب
ولا من أمتي الوجع ينبض بقلب
عد الضحايا وابقي قولي وصلت كام
ع الجراح ارمي السلام
وابتدئ القصة الجديدة
ارمي شباكك ف الغريق
لملم ف لؤلؤ أو محار
وارمي بحياتهم ع الشطوط هيشوفو موت والجرح نار

تبقي القياسي ف الالم
عد المأسي بالقلم
ايه يعني كام قلب انظلم
علشان تراضي نشوتك
يا قوتك
الجرح يفرش سكتك دمع القلوب
انت لو كل العيوب ليها كتاب هيكون حياتك بامتياز

أحرق بجاز كل القلوب ساعة وفا
يالي انت قلبك ما اكتفي من جرحنا
هو انت فاكر ربنا هتفوت عليه
بكرة اكيد هيبان عليك وجع السنين
تتمني م الليل الحزين لحظة شروق
اوعاك تفوق أو تعتذر
ده العدل لازم ينتصر وتكون جريح
وحياة دموعي وغربتي هاعمل جراحك 100 ضريح
وتكون مزار للانهيار والانكسار
ويكون مزاد الاختيار
تفضل وحيد

مبروك عليك تندم ليلاتي ف ذكرياتي وتكون جراحك ليا عيد
انا قلبي مؤمن بالنصيب ارجوك تغيب
وبلاش تعيش دور الشهيد
انت حسابك في الحياة عدل الإله
والله يفعل ما يريد