رشا ناجح تكتب : وبرغم آلامى

وبرغم آلامى
النايمة ليلاتى ف حضن ضلوعى
وبرغم آهاتى
السارية تملى ف قلب وريدى
وبرغم الحكايات المرة

أنا ضد الكسر
أصل أنا قررت
وم اليوم
أتغلف بكرامة نفسي
وأحصن قلبي من الأوجاع
وأقول للحزن
كفاية خلاص
وأبدأ من يومى أروى
حكايتى
وألحن موال تفاصيلى
وأعزف ع الناى
اللى ملامحه
تشبه لملامحى وتقاسيمى
وأكوم من صخر همومى
وأقسم من تانى جناين
وأزف الحاضر ع الماضي
وأبروز حبى اللى جمعهم
ف خريطة قلبي وشراينه
وأقول مبروك