لوغمض يعمل ملايين.. السيسى : عز مصر وشرفها وكرامتها فى مكافحة الفساد.. واللى ياخد جنيه ملوش مكان بينا
كتب – عاطف عبد الستار
أثنى الرئيس عبدالفتاح السيسي، على جهود اللواء محمد عبدالحي، رئيس مجلس إدارة الشركة الوطنية للزراعات المحمية، التابعة لجهاز مشروعات الخدمة الوطنية.
ووجه الرئيس، خلال افتتاح 1300 صوبة زراعية بقاعدة محمد نجيب العسكرية، اليوم السبت، سؤالًا إلى اللواء محمد عبدالحي على الهواء مباشرة قائلا: “أنتَ بتقبض كام؟ ليرد الأخير: “بقبض 14 ألفًا و200 جنيه شهريًا”.
وبعد كشف رئيس الشركة عن راتبه أمام الرئيس، أوضح السيسي: “محمد لو غمض بس في يوم ممكن يعمل 12 مليون جنيه وأكثر، وكنت بسأله في يوم أنت ساكن فين؟ قالي أنا ساكن في حتة بعيدة، فقلتله أنت ساكن في مكان بعيد يعني حوالي 40 كيلو رايح و40 كيلو جاي، وبتستخدم سيارة الجيش، وكمان بنزين، يبقى لازم تنقل في مكان بجوار الشركة، قالي أنا معنديش غير الشقة دي، قلتله بعها واشتري شقة في مكان قريب من الشركة”.
وتابع السيسي: “ممكن حد يقولي خليه ياخد فيلا أو شقة من اللي بتعملوهم، لكن أنا بقول من أول أنا ولحد أي شخص، جنيه واحد لأ.. واللى يعمل كدا ملوش مكان بينا، في ناس بتطلع بكلام مغرض، لكن والله ملوش مكان بينا ولا بشكل قانوني أو غير قانوني، المقابل مش فلوس بس، المقابل عز مصر وشرفها وكرامتها بين الدول”.
السيسي: مش هاسيب لابنى جنيه ولا لنفسى .. ومش هخلى حد ياخد حاجة مش بتاعته
وقال الرئيس عبد الفتاح السيسي: “ياريت الناس تفتكر أنى مش ضد حد .. لا والله.. أنا ضد الفوضى والإهمال واللا دولة، وكل الناس فى مصر أهلى وإخواتى، إنما الناس بتعمل اللى هى عايزاه ود لا يليق بمصر، ومش هنسيب حد ياخد حاجة مش بتاعته”.
وتابع الرئيس السيسى، خلال حضوره افتتاح مشروع الصوب الزراعية بقاعدة محمد نجيب العسكرية: “امال احنا قاعدين نعمل إيه، وأرجو موضوع كنج مريوط ده يخلص، أنا شوفت فى الطيارة وأنا جاي مزارع سمكية، ودى مزارع حد يقولى حجم المزارع قد إيه والعائد منها قد أيه، وبقول على كل المزارع السمكية.. لما كامل الوزير قال نوسع محور 26 يوليو قولتله فى محور تانى اسمه أم زغاوى، قولته نعمل المحور ده ونعمل محور تاني ينهى التعدى على بحيرة كنج مريوط، ومعناه أن موضوع تقنين أراضى اللى اتاخدت من كنج مريوط يخلص.
“.
وأكمل الرئيس السيسى: “مش هنعمل مزارع سمك فى البحيرات، ولازم المياه تكون نظيفة، هرجع بحيرات مصر تانى زي ما كانت طيب، والناس اللى موجودة هناك قولت يتعرض عليا الموضوع، ولا يقنن الوضع إلا بعد العرض عليا، ثم يتعمل المحور، ويقطع الحد الخلفى للتعدى الموجود على البحيرة”.
وتابع: ” والله العظيم أنا مش هاسيب لابنى جنيه ولا لنفسى، وده معناه أنا عارف كويس أوى أن اللى بياخد حاجة من الاستيلاء وغيره حرام، ولابد من إيقاف الهدر، وعدم الانضباط”.
السيسى يكلف القوات المسلحة والداخلية بحل مشاكل محور المحمودية خلال 3 أيام
قال الرئيس عبد الفتاح السيسى، أن محور المحمودية يواجه مشكلتين، الأولى تتعلق بسوق الحضرة، لافتا إلى أن هناك مخطط لإقامة سوق أخر مكان هذا السوق، مطالبا بضرورة افتتاح هذا المحور خلال شهرين أو ثلاثة شهور دون وقوع أى أضرار للمتواجدين فى السوق، من خلال بناء سوق جديد.
وأضاف الرئيس السيسى أن المشكلة الثانية تتمثل فى المسجد الموجود بالقرب من المحور متابعا: “أنا بقول لكل اللى بيسمعنى فى مصر، أن المسجد ده والمقام الموجود فيه بيعيق الحركة فى المحور.. احنا بنتكلم عن مشكلة عامة.. والله العظيم النبى محمد ما يرضى بكده..احنا قولنا شوفو مكان جديد واحنا نعمل مسجد طبق الأصل وأحسن من المسجد ده.. زى ما عملنا مساجد قبل كده.. اللى كان موجود غلط وكان تعدى.. والمساجد والكنائس لا تبنى على الأرض غلط أو حرام.. ولكنها تبنى على أرض صح بموافقة الدولة.. واللى مش يعمل كده بيعمل حاجة غلط.. وده من منظور دينى.. الأرض لا يتم وضع اليد عليها ونقول بنبنى جامع.. ربنا مش يقبل الجامع بتاعه يتعمل كده.. ربنا يقبل أن الجامع بتاعه يتعمل على أغنى أرض بالفلوس.. تتحط الأراضى وتتخصص أو تشترى.. لكن أننا ناخد الأراضى علشان نعمل مسجد نصلى فيه.. طبعا “.
وتابع الرئيس السيسى، أن وزارة الداخلية والقوات المسلحة مسئولة أمامى وأمامها 3 أيام من أجل حل هذه المشاكل بشكل كامل، متابعا: “محدش يتعرض للدولة فى مصلحة الدولة فى مصلحة المواطنين”.
الوطنية للزراعات المحمية: إنشاء أكبر مشروع زراعى بالصعيد على 62 ألف فدان
قال اللواء محمد عبد الحى محمود، رئيس مجلس إدارة الشركة الوطنية للزراعات المحمية، أنه جارى إنشاء أكبر مشروع للزراعات المحمية فى جنوب الصعيد فى محافظتى المنيا وبنى سويف، حيث يتم إنشائه على مساحة 62 ألف فدان، ليوفر 250 ألف فرصة عمل.
وأضاف اللواء محمد عبد الحى محمود، خلال كلمته بافتتاح الرئيس السيسى لـ 1300 صوبة زراعية فى قاعدة محمد نجيب، أن الهدف من هذا المشروع الكبير، هو إنتاج الخضروات والفاكهة بأنواعها المختلفة، بالإضافة إلى إنشاء زراعات متعددة تساهم فى توفير الخضروات فى السوق المحلى، وفتح أسواق تصديرية كبيرة.
خوسيه مورينيو لـ السيسي: الثورة الزراعية معجزة أصبحت حقيقة فى مصر
قال خوسيه مورينيو، مدير عام شركة الإسبانية للصوبات الزراعية، إنه لشرف له حضور افتتاح مشروع كبير، مؤكداً أنه يبدى إعجابه بما يجرى فى مصر، قائلا: “ما يحدث لم يكن ثورة زراعية ولكنه معجزة”.
وتابع خوسيه مورنيو، خلال حضوره افتتاح مشروع الصوب الزراعية بقاعدة محمد نجيب العسكرية بمرسى مطروح: “الثورة الزراعية معجزة أصبحت حقيقة سيدي الرئيس رؤية سيادتكم كانت رائعة، والعالم يشهد لكم بنجاح المشروعات وهي لها تأثير كبير على السوق فى انخفاض الأسعار”.
وتابع مدير عام الشركة الإسبانية، أن العالم يؤمن بأن هناك تغير للمناخ، وأن مصر ستكون مصدر مهم لإمداد العديد من الدول، ومشروعكم من أهم المشروعات العالمية.
وافتتح الرئيس عبدالفتاح السيسي، 1300 من الصوب الزراعية على مساحة 10 آلاف فدان في إطار المرحلة الثانية من “قطاع محمد نجيب للزراعات المحمية”، في منطقة الساحل الشمالي.
وأوضح السفير بسام راضي، المتحدث باسم رئاسة الجمهورية، أن إنتاج المشروع يعادل نحو مليون فدان من الزراعات التقليدية، كما يعد المشروع الأكبر في مجال الصوب الزراعية بمنطقة الشرق الأوسط.
ويهدف المشروع إلى المساهمة في تحقيق الأمن الغذائي وسد الفجوة بين الإنتاج والاستهلاك فضلا عن تعظيم الاستفادة من الأراضي المتاحة للأنشطة الزراعية مع ترشيد استخدام مياه الري.
وتأتى الصوب الجديدة، ضمن المشروع القومي للصوب الزراعية، الذي تنفذه الشركة الوطنية للزراعات المحمية، التابعة لجهاز الخدمة الوطنية للقوات المسلحة.
ويهدف المشروع إلى إنشاء مجتمعات زراعية تنموية متكاملة، وإنتاج منتجات زراعية ذات جودة فائقة، وتعظيم الاستفادة من وحدتي الأرض والمياه، وإتاحة فرص عمل جديدة بمناطق الاستصلاح المستهدفة، كما يعادل إنتاج المشروع نحو مليون فدان من الزراعات التقليدية، ويعتمد على ترشيد استخدام المياه تتراوح من 15 إلى 20%، كما يساهم بشكل كبير في زيادة الصادرات الزراعية المصرية، وتدريب عدد كبير من الشباب والعاملين بالمشروع على أساليب التكنولوجيا الحديثة.
