منى جلال تكتب : رايات الحزن

مافيش فايدة لغاية إمتى مش فاهمه هتفضل دنيتي دايماً ..معايا قاسية ومعاندة ؟
ومهما عملت انا معاها عليا تملي مش راضية
ومن صغري

باشوف الفرحة ممنوعة رايات الحزن فوق عمري وطول الوقت مرفوعة
وعايشة حياتي ع الفاضي
وبانفخ قربة مقطوعة
وزرعاني ف قلب الهم
ولا بترحم ف يوم ضعفي
ولا بتهدى ولا بتتلم
وساقياني العذاب أنهار
خلاص بانهار

وباتعذب وطافحة الدم
وقلقانة ومحتارة
وعايشة حياتي منهارة
ولما بتقسى انا عارفة
بتبقى القسوة جبارة
مافيش فايدة ..
ولا راضية عليا تحن
خلاص قربت إني اتجن
هموم الخلق بالكيلو
و وزنالي الهموم بالطن
وحتى النوم صبح كوابيس
ببان الفرح مقفولة
تملي قصادي بالترابيس
وقافلة السكة قدامي
وعلت ياما في المتاريس
مع الرغم اني حباها
وحابه العيشة جواها
ولو خاصمتني مش باقدر
بسرعة باروح مصالحاها
واقول يمكن عليها اصعب
وترحمني وتكرمني
والاقي من الجراح مَهرب
ومهما ابعد

ورايا بتجري وتقرب
حياة في الأصل منحوسة
وماشية معايا معكوسة
بتتفنن ف أوجاعي
يوماتي بخطة مدروسة
إلهي يا عالم الأحوال
أنا صابرة وصبري جبال
خلاص مش قادرة أتحمل
ضربت من الوجع أمثال .
Yoast