حاضنه السما

حاضنه السما
———-
واخدة السما ف حضني
وصغارها حواليا
نجوم ماليها ريش
دايخة ودبلانة
ونفسها تنور
وأنا بافتش جيوبي
عن لقمة أو مية
لقيتها فاضية قوي
عمالة بتصفر
ودار ما بينا الحديث
ع الحلوة والمرة
أنا قلت: شفتي القمر
قالت: ولا مرة
أنا قلت: هو القمر
سافر بلاد بره؟؟
حسيتها ناسية العيال
بتقول وأنا مالي
ماعدش ليهم تمن
لا رخيص ولا غالي
ساحلنا كان الرضا
قال ايه بقا شمالي
لما النجوم تنطفي
بإيه تفيد السما
حافتح عينيه ليه
خلاص ماصابها العمى
ولافيكي فايدة ياعين
لو قاعدة أو أرحل
أنا كنت راسمة سنين
ابقا فيها الأول
وجت غيوم الهموم
ومزعت حلمي
حتى سحاب السما
اصبح بيتسول
يا رب يا جبار
يكبر ف يوم أملي
ويعود كما الأول
تلمع نجومي الصغار
تكبر وتبقى شموس
والضلمة ما تطول
—————

إلهام عفيفي
من ديوان “صبر أيوب”