مسلسل60 دقيقة
بقلم…. مني ياسين
بعيدا عن إن الحلقة الأخيرة تكرار للحلقة الأولى واللي ما أضافتش جديد لكن فكرة المسلسل جديدة وحلوة.
_الطفل العدواني اللي بينبأ بشخصية سادية وإنكار الأم. (اللي تمثلت في البطل وأمه)
_مريض الاكتئاب اللي محتاج علاج ورعاية من نوع خاص وإنكار الزوجة للمرض النفسي من أصله. (اللي تمثلت في أبو البطل وأمه) واللي انتهت بانت-حاره قدامهم
_اكتئاب ما بعد الولادة واللي ممكن يخلي الأم تفكر في الانت-حار. (اللي تمثلت في سارة)
_الهشاشة النفسية اللي ممكن تخلي صاحبها يلجأ للانت-حار من غير ما يحس (اللي تمثلت في زوجة البطل)
_رفض المرض النفسي كوصمة عار.
_ التنمر وخصوصا في مرحلة المراهقة اللي ممكن يخلي بنت لسه في مقتبل العمر تكره نفسها.
_نظرة المجتمع للمنتحر أو للي بيحاول يعملها لو تم إنقاذه.
_خوف الأم من موقف الأب لو عرف إن بنته اتعرضت لاستغلال جنسي…
اختيار الممثلين كان موفق جدا
البطل صاحب الوجه الجديد وتعبيراته الغامضة دوما.
ياسمين الرئيس واضطراب شخصية البطلة وانفعالاتها.
سوسن بدر والشخصية المتسلطة اللي أدتها بجدارة ثم انهيارها بعد كده لما ابنها مات وهي بتخلع باروكتها السوداء وتموت بعدها.
شيرين رضا المحامية وسرعة انفعالاتها نتيجة ما مرت بيه من ظروف.
زوج المحامية وطيبته مع حبه ليها وهو مش عارف يراضيها إزاي نتيجة المشكلة اللي عنده.
سارة وزوجها
يارا ومامتها
محمود وصاحبة البطلة وغضبهم من ارتباطها بالبطل
دكتور علاء صديق أبو البطل وأستاذ البطل وهدوءه واستيعابه للمشاكل النفسية اللي عندهم.
مشاهد كنت أريدها أكثر قوة:
كنت أحب لو ظهر إن زوجة الظابط كانت إحدى الضحايا مثلا وموقف الظابط وقتها كان هيبقى إيه وخصوصا اتصالها المتكرر أثناء وقت الإعدام كان إيه مبرره؟
موقف الزوج الأناني وهو بيقنع زوجته إنها تنتحر بعد ما عملت فيديو فضحته فيه، قتلها ليه هنا مافهمتش وقتها جابت الشجاعة دي منين؟ وهل هي كانت مخططة لده وهي بتقابله، طيب لو كانت مخططة فين أداة الجريمة وهي لولا التمثال اللي كان ع المكتب ماكنتش عرفت تقتله، ثم التمثال ده أساسا هي جابتهوله هدية قبل كده وهو قالها إنه هيحطه في البيت مش في العيادة!
إنكار الأم لاكتئاب زوجها وسادية ابنها كان غير مبرر إلا لو كانت من علية القوم وخايفة على منظرها مثلا لكن المسلسل ما بينش إنها على تواصل مع أي حد أساسا!
جميل كمان إنه ٨ حلقات على اعتبار إن التاسعة مكررة
