شرف الغرق
بقلم… مني حموده فؤاد
برجين حمام
بالسلام مراسيل
برجين ولكن
مش كفاية
محتاجة غية
ألف غية تقول سلام
مراسيل وشوقي
لَو يلتقى بالشمس
كأنه طفل محتاج الهداية
في نن عينك يبتسم
أو ينهزم
قُدام شفايفك والغواية
تلمس إيديك الفل
روحي
تنتفض ياسمينة بيضا
في قلبي راية
ما أنت رِي الأرض ديمًا
وأنا أرضي عطشانة الرواية
هيسبحوا المراسيل وشوقي
ويعذروني لما أقول
بُرجين حمام دول
مُش كفاية
………..
ولسه بردو مَفسروش
مَعنى الرسالة
والقول يطول عنك يا ذاتي
وكلام يبان في العين سُكات
مقامُه أعلى من القوالة
ما هو صَعب بردو حد زيك
يوصفوه بحروف بَناتي
مش صعب بس
دا حاجة أقرب لاستحالة
……
في الليل فراشة بترسمَك
نجم في سَمايا
وتسلمك مفاتيح حكايتي
من البداية للنهاية
وتعَشم القلب اللي ضالل سكتُه
عن رحلتُه
من طرف رمش وغرقته
جوة الجفون
يشهد لها في الحسن آية
طَل النهار
وأنا لسة بَنجو من الغرق
راح مد إيدُه وشدني
على شط روحه
قلبي اتسرق
سَلمت ورفَعت الرايات
إيه يَعني قلبي
عني راح ليه وافترق
فَهمس لي قَلبي من سُكات
أنا عنده راضي
هَجيبهُ ليكِ
يبوس إيديكِ
عَشان ينول شَرف الغرَق
كان حلم يمكن
بس كان زايد حلاه
صحيت وروحي
طايرة ع الشباك يمامة
بتقابل المراسيل
وشوقي الورد توبة
راجعين لي
فوق جبين الحب هامة
برُجين حمام
ياسعدي لما حضَنتهم
وشوشتهم مين القمر
دا في وسطكم زايد وسامة؟
دندنو لي أحلى غنوة سمعتها
مرسال حبيبك شوقه مبعوتلك أمانة .
