فوبيا غرام
فوبيا غرام
بقلم… مرفت شوقى
شوفت السؤال اللى ف عينيك
من غير ما تسأل ليه كدا
وما فيش إجابة ممكنة
غير دمعه مِنّى قُريبة
وقت الحنين
والضحكة واخدة في حضنها
القلب الحزين
عشان يواسي في الآلم
أنا اصلى قلبى مختلف
يقدر يداوى اللي انجرح
يرسم ملامح للفرح
لو حتى كان حلمه اندبح
لازم يعيش ناسى الآلم
انا قلبى مقسوم حتتين
الأولى يقتلنى الحنين
على ناس مفارقة من سنين
لقلب يشبه في الصفا
قلب الجنين
والتانية مشتاق للغرام
لقلب عاصى يقول حرام
العشق دا مش سكتك
وعشان كدا أنا بانصحك
بلاش مخاطره أو عناد
خليك على خط الحياد
أوعاك تصدق في الهوا
كل الكلام
أنا باختصار
في قلبى فوبيا م الغرام
محتاج له كورس من الدوا
حبيب ما يعرفش الوجع
ولا له سوابق في اللوع
ويحبنى وحدى أنا
مايهمهوش لوم الِعدا
لو جه وصرح واعتَرَف
إنه في غرامي مختلف
ساعتها يمكن اصدقه
واديله قلبى يعلمه
كل الحكاوى ف الغرام
