فراقنا العظيم

فراقنا العظيم

شعر… علا بركات محمد

وجايز ويمكن دي أصغر حاجات
وكل اللي يوجع يكون إرهاصات
وتقديمة هامة لفراقنا العظيم

وخوف بعد خوف..
نسلم وجودنا بفعل الظروف
وننزل واقعنا نساوي الصفوف
وهنقول… ظروف
أقولك حقيقي.. ماعدتش باخاف
ولا عاد طموحي يصد التحدي
أنا بس باحضن دموعنا الكتيرة
وباحزن لوحدي

وبتقول هتكمل حياتك في خيري؟!
وإنك لا يمكن هتحزن لغيري؟!
هتبكي لمين؟..
ومين بعد موتنا هيفضل حزين!
وجودنا ف وجودنا.. مافيش اختيار
موافق تهادن؟!.. ده آخر قرار؟!

لحد الوجع ده ماقولتش بجد
ماقولتش هتبعد إلى أي حد
لحد الوجيعة.. القطيعة.. الممات!
وبرضه باقولك دي أصغر حاجات
وكل اللي يوجع أكييد إرهاصات
وتقديمة هامة لفراقنا العظيم

عرفت النهاية تسلم لفين
عرفت الجحيم!!!