انا المسجون
شعر… نشوى الخطيب
أنا المسجون
بصوت الحرف متكتف
ولو أصرخ حبال
صوتى تلسوعنى
ومين شارى
ومين باعنى
مسكت السن بسنانى
عشان إيدى
بترعشنى
وجيت أكتب لقيت سن القلم رافض
يطاوعني ويسمعني
مهوش عايز يكون
ف الضل متلجم
ومتحجم
سنين وسنين بيكتب آه
ويغلى من نيران جواه
يلاقي الحق متبدل بكدب و زور
و نزرع فى طريقنا
الخير
بذور وجدور
ونرويها نقول يمكن
يجينا النور
يهب ضباب
ويخفيها ويخفينا
مصمم إنه يعمينا
ونصبح بور
وتصبح بور
