شرق الترعه (2) من ( من ديوان زعلانه منك )
بقلم… أميرة محمود
شرق ترعتنا
اللى نازفه من جدورها الدم
ناس غلابه
طافحه قوتها هم فوق الهم
لجل كسرة عيش تداوى
قدحه و ناكلها بغناوى
شرق ترعتنا
شرق ترعتنا العتيقه
ناس ف فرح
و ناس ف ضيقه
ع الرصيف
المنسى من دهرالزمان
كام حلم طب
عربيه بتعافر
و توصل رغم الف مطب
و عيون حيليوه
نعسانين شد وا ستايرهم
شقا من ضهر شق
متعلمين سف المرار
و البهدله على حق
منسيه خالتى
شايله من الحمول اردب
لكن بتسعى لررزقها
و تقول يا رب
لما دب الشوق ندهلى
مهما يجرا هما ناسى
و هما اهلى
شرق ترعتنا
اللى نازفه من جدورها دم
بنت سمره
بتترجف م البرد
مستنظره واحد جماله زيها
ينشلها من سن الجبل للارض
القفه فوق راس امها
تقيل حملها
و ابوها راجل ضهره محنى
م الوجع قلبه اتوجع بالهم
شرق ترعتنا
اللى نازفه من جدورها الدم
اكوام زباله
جمب مدرستى الجميله
معزه بتمأمأ
قرب حصة التعبير زليله
الجوع بيقرص بطنها
و دي له زميله
شرق ترعتنا اللى نازفه من جدورها الدم
عيال و شوشها م التعب
بقيت دميمه
يعافروا لجل شقة عيش يتيمه
بيكملوا باقى عشاهم
لعبة المركب
قرطاس ورق
شنقان ف مية طفح
ف البيوت اللى سكنها القحط
و هناك فى شلة مرعبه
طلقين شعورهم ع الكتاف
متعشمين صاحب مجاش
جو الفانوس
يبعت فلوس من غير شقا
شرق ترعتنا اللى نازفه من جدورها الدم
الفين تحيه ياسطى
جرجس احلى ترزى
سهرانه قهوة عم فوزى
و صوت بيشغى
ف بيعه هتعشى الغريب
ينشبله بالحب الدقيق
على فرخه كانت
جدعه ف العشرة الطويله
المهم ان اتستر و سط القبيله
شرق ترعتنا
اللى نازفه من جدورها الدم
بنت الجيران ف الفرح ملهيه
بتغير الفستان ورا الفستان
مش مننا هى
احنا اللى منسين بالفعل و النيه
شرق ترعتنا
اللى نازفه من جدورها الدم
ناس غلابه
طافحه قوتها الهم فوق الهم
