حبك على قدي (قصيدة غنائية)
حبك على قدي (قصيدة غنائية)
شعر…. ماجدة البهيدي
أه يانا من الحب وحيرته
أنا بس أيه اللي عملته
كان قلبي بيسهر طول الليل
لو مرة حد يجيب سيرته
بقى هو ده كده أصبح حالي
ده أنا والله ما يخطر على بالي
إني أحبك و أدوب في عينيك
و يجرالي معاك اللي جرالي
بقى ده أسمه كلام كده يا غزالي
تخطف قلبي و تقيد ناري
وتروح متجيش والنوم ده مفيش
و تفرح فيا انا عزالي
كنت أنت النسمة اللي تهدي
على رمش عيوني وعلى خدي
و العمر معاك فى ثواني بيمر
كان حبك توب كده على قدي
أه يانا من الحب وسيرته
انا بس ايه اللي عملته
كان قلبي بيسهر طول الليل
لو مرة حد يجيب سيرته
ياللي أنت شاغلني ليل ونهار
الفكر معاك أهو داب و أحتار
على برك قولي و رسيني
لحسن ده القلب مولع نار
يا أبو رمش جرئ وعيون تدبح
على طول انا فيك دايما بسرح
أه يانا يا ناس جنني خلاص
وأدي قاعدة معاك والله ما أروح
يا أبو ضحكة جميلة بتخطفني
أول ما بشوفها تحلفني
وحياة رمشك حن شوية
ده الشوق لعينيك هيموتني
أه يانا من الحب وسيرته
أنا بس أيه اللي عملته
كان قلبي بيسهر طول الليل
لو مرة حد يجيب سيرته
