ند لند
ند لند
شعر…. نهلة زكي
دة انا كنت جاية بحب مالهوش حد..
ليه تبني بيني و بين براحك سد؟!
أنا كنت طفلة بخوف بتجري عليك ..
ليه اتعاملت معايا نِدّ ل نِدّ ؟!
دة انا الضعيفة و قلبك الجبار ..
و انا اللي عايمة ضد ١٠٠ تيار ..
و انا اللي ماسكة في إيدي جمرة نار
ليه قبل ما اسند ع الجدار يتهَدّ؟!
شوف جيش عنادك في الطريق داس مين
و انا اللي دمعي يزهّر الياسمين
بس الأمان و عيوني متخاصمين
و كل ما افتح باب قوام يتسد
ليه نقفل السكة وما بيننا كلام؟!
و بكل قسوة نبعتر الأحلام..
شمسك تغيب الكون بيبقى ضلام
و الدنيا كانت دافية صارت برد
كل السنين ضاعت فدا لعنيك
و ان كان باقيلي قَليل كمان هادّيك
قدمت كل ما عندي .. إيه يرضيك؟!
العمر راح و لحد كام هنعدّ؟!!
أََحلف هتفضل ف الفؤاد ساكن..
صباحات تنادي: (تعالى)، و أماكن
فدادين غرام ف القلب ليك لكن..
سكين جفاك قَطّع غصون الورد
مهما الليالي القاسية بيننا تفوت..
لسة الأمل طارح ومش هيموت..
عايزاك باقولها بعِلو علو الصوت
ليه كل ما ارخي الخيط إيديك بتشد؟!!
رغم السنين الحب لسة شباب..
و بدون هواك كل اللي جيّ عذاب
قلبك سأل قدمت ألف جواب..
وكل ما ارمي سؤال يغيب الرد..
اللي اتزرع ف القلب عمره ما مات..
في عنيك سافرت وحِلْيِت الأوقات
شكرا يا حب العمر ع اللي فات..
الوهم راح و احنا ف أوان الجد..
ليه اتعاملت معايا ند ل ند؟!
