رضا عبادة يكتب : ترنيمة وجع

الكلمة…..الكلمة ف بحور المعاني المبهمة ….
يمكن تتوه من نظرة ف عيون الغزال
ياااااه ع الجمال …لَمَّن تكون الصورة مفتاح الأمل،أو قد تكون……
أو قد تكون قشاية تنشل من غرق…
للروح ف موجة معطيات
كل اللي فات…..

كل اللي فات تقديمة لسنين الوجع حاضر ، وآت خلخالها كان دايمًا زمان بيحرّك القلب العفي دلوقت أصبح الانسيال موروثه ف الجن الخفي
كل العيال…….

كل العيال متشعبطة ومْعَبّطة ف حبل البدع،
آاااااه ياجدع…..
ما الدنيا ترنيمة وجع
كل الحقايق مبهمة أو ربما جايز تكون …
مخفية ف الكواليس
واليوم حيطانه مْشَققة وسقف الحقيقة من جريد
مش راح يفيد الصمت عن دلع البنات
والحلوة طالبة ” مفتّأه” والقلب أصبح من حديد ياعينيا ماتفوقي بقى….
إوعاكِ لَيدِبّ المرض جُوّا النخاع،
ويسمم الشرايين
والسقف فوقي ينَزّل التعابين….
كل الأعادي……

كل الأعادي اتجمّعوا باصين على ” الكِردان”
والبَصّة من عينِك رضا
واسمي…..”رضا”
طالب رضا من ساحة الرضوان
كان الحلق مرسوم ف شكل المخرطة….
يامْخَرّطة كُلّ الألاعيب التي…..
قد أيقنت أن البهية في القلوب تربعت
من غير حلق يكسي الودان،
أو حتى كِردانك كمان
صوت الكمان بيحَرّك المواويل
تعلى وتعلى معاه من رنة الخلاخيل
قل لم تميلْ.
قل لن تميلَ بقلبها،
أو أن تفوزَ بحبها إلا إذا…..
قاتلت من قاتل أبِيّ
إني الأبِيّ
يامبتدي في الحب حدد مقصدك قبل الرحيل
وازاي تكون مخلص لها.