مش لاقي وقت لافتتاح المشروعات.. السيسي: تقدروا تحاسبونا 2020..مدرب مصرى للمنتخب..استفدنا من ترسيم الحدود ..كل ما تشتكوا اشتغلوا أكتر.. 14 رسالة من الرئيس فى ختام مؤتمر الشباب
كتب – عاطف عبد الستار وعبد العظيم القاضى
قال الرئيس عبد الفتاح السيسي، إن الدولة المصرية أنجزت عددًا كبيرًا من المشروعات وجاهزة للافتتاح و إن مؤتمر الشباب منصة للتواصل مع المصريين والشباب بشكل كبير.
جاء ذلك خلال جلسة “اسأل الرئيس” ضمن فعاليات مؤتمر الشباب السابع، في العاصمة الإدارية الجديدة.
وأضاف السيسي: “والله العظيم إحنا ما لاقيين وقت لافتتاح مشروعات هتسعد المصريين وتبين إن إحنا ماشيين بشكل جيد، أنا بقول للواء محسن عبد النبي، (مدير مكتب الرئيس)، أنا مستعد يوم الجمعة لافتتاح تلك المشروعات”.
اشار الرئيس عبد الفتاح السيسي، الى إنه بحلول منتصف العام المقبل سيشعر المواطنين بالتغيير، متابعًا: “هتقدروا تحسابونا بجد من 2020 وأنت طالع”.
وأضاف الرئيس السيسي: “كل ما تلاقوا نفسكنم بتشتكوا ومش عاجبكم حاجة اشتغلوا أكتر، وكل ما حد يتآمر عليكم متضيعوش وقت معاه، ضيعوا وقت مع العمل والجهد، أن معاكم وعايزكم جنبي”.
وأضاف الرئيس: “خلال عام 2020 ننطلق بشكل قوي تظهر أثار الإصلاح لنا جميعًا كمصريين، إحنا بنسابق الزمن، مش علشان أنا في الموقع ده، ومش شكر في الحكومة، بس التحديات كثيرة أوي، والوقت اللي اتأخرناه كبير أوي، وعلشان نوصل للمستوى اللي بنتمناه محتاجين وقت وجهد، قطاع زي الكهرباء مثلًا علشان نطوره احتاج 600 مليار جنيه، إحنا معانا وزراء أغلبهم فاهمين وكويسين وبيبذلوا جهد ومخلصين في عملهم”.
واستطرد: “الناس هتحس بالتغيير من منتصف العام القادم، هتقدروا تحسابونا بجد من 2020 وانت طالع، في موضوع زي الثقافة هنحس بالآثار أمتى؟ مش هنقول خلال سنتين ثلاثة، لكن ده ممكن، لو كلفنا حد بانتقاء مجموعة من الشباب الموهوب ونفذ هذا الدور”.
واستكمل الرئيس الإجابة عن السؤال قائلًا: “بقول لوزير الشباب إن فيه 3 معايير للنجاح، أولها الانتقاء، ثم الفرز، ثم التدريب والتقييم والمتابعة، هنحقق نتائج هائلة، عايز فريق كرة قدم كويس؟ مش ممكن تقولي إن مصر فيها 100 مليون مصري مافيهمش 1000 شاب جيد، لكن المشكلة في آليات العمل، ده مايزعلش حد، بس ده الفرق بيننا وبين الدول المتقدمة، دول مش بيفرزوا في بلادهم بس، دول بيفرزوا في بلادنا احنا كمان، كل قطاع فيه المميزين لكن الفكرة إزاي نوصلهم”.
وأكد السيسي، إنه بعدما تعرض إليه المنتخب الوطني لكرة القدم من خسائر في الفترة الماضية؛ توقفت وزارة الرياضة عن الاستعانه بمدربين أجانب لتدريب المنتخب.
وسأل السيسي ، الحضور: “هنجيب مدربين أجانب تاني؟”، ليرد مازحا: “خلاص مفيش بقي”، موضحا: “أحنا ليه معندناش ثقة في المدربين المصريين ولازم ندي الفرصة.. النتيجة واحدة”.
وأعلن الرئيس عبد الفتاح السيسي، إن الدكتور طارق شوقي وزير التربية والتعليم، يرغب في بناء 250 ألف فصل دراسي لتخفيف التكدس الطلاب، من أجل أن تصل النسبة لكثافة معينة “إحنا مش بنتكلم أن الفصل يوصل لـ 20 طالبًا لأ، إحنا بنعمل كثافة معينة بس”، وهذا يكلف الدولة 125 مليار جنيه.
وأضاف السيسي: “المدرس مثلا يقول أنا مش قادر أعيش بالراتب ده، أه أنا عارف، بس مش قادر، ودي إشكالية في مصر، عارف إننا مطلوب مننا نعمل إصلاح لحال العاملين في التعليم والصحة عشان نوفر لهم الظروف المناسبة لعملهم”.
وتابع: “مثلا إعلامي يطلع يجيب صورة لمدرسة عاوزة تعديلات ويقول الدولة مش بتعمل، لا ده بناء انطباع خاطئ ووعي خاطئ عن حجم المشكلة الدولة بتحاول تعمل في إطار عن إمكانيتها
اوضح السيسي، إن قطاع الإعلام في مصر لم يصيبه التطوير منذ فترة طويلة، ولم يصبح يحقق الأهداف المرجوة منه مثله مثل باقي قطاعات الدولة التي لم يُصيبها أي تطوير، وهذا يُسبب مشكلة كبيرة للغاية سواء في قطاع التعليم أو الصحة أو الثقافة أو الاقتصاد.
وقال السيسي، أن الإصلاح أصبح واجبا لكل القطاعات بما فيها قطاع الإعلام، وهذا لا يعني الإساءة لأحد، مؤكدًا أن الإعلام كمنظومة ينشق إلى شقين، شق اقتصادي حيث تقدم الدولة للإعلام 6 مليارات جنيه، والعوائد من أنشطته على الدولة 2.3 مليار جنيه فقط.
وتابع: “الشق التاني وهو الشق الفني يا ترى هو ده اللي إحنا بنتمنى نقدمه، لا طبعا، كان الإعلام في الستينات له تأثير كبير جدًا وكان ليه عوايده، حصل تطور في الدول العربية، بس إحنا في نفس الوقت فضلنا زي ما إحنا، بس لا يرضي الكثيرين من الناس أداء الإعلام في الوقت الحالي”
وأوضح: “إحنا حاليًا مش بنتكلم في عشرات المليارات، إحنا بنتكلم في مئات المليارات، وأوعد الشعب المصري إن السنة الجاية إن شاء الله هنشوف نقلة نوعية معتبرة في القطاع خلال السنتين اللي جايين، فيما يخص المترو أو السكك الحديدة، سواء تطوير الشبكة أو كهرباء الشبكة، السنة الجاية هنلاقي الوضع أحسن بكتير”.
وأكد أن ترسيم الحدود مع قبرص، كان فرصة لمصر: “كما أن ترسيم الحدود مع السعودية بيوفر لنا فرصة تانية لا شك، المناطق اللي ممكن تنقب فيها بقت متاحة، وبالتالي فرص إنك تجد حقول واكتشافات أخرى تضيف إلى رصيدك بالتعاون مع دول المنتدى لتعظيم ما لدينا، أنا بتمنى دايمًا من ربنا سبحانه وتعالى ومع زمايلي في الوزارة وقطاع البترول، محتاجين نجتهد أوي بحيث نقدر يبقى لينا إنتاج يساهم كموارد تساعد معانا في ظروفنا، ماشيين بشكل جيد جدًا سواء بترول أو غاز، معندناش مشكلة في الغاز، ونتمنى نحقق ده في البترول خلال الفترة القادمة هيبقى نقلة كبيرة جدًا لينا”.
أهم ما جاء بجلسة اسأل الرئيس السيسي فى ختام المؤتمر الوطني السابع للشباب
1- نسعى إلى تفعيل دور المحليات، لأن اختيار أعضاء المجالس المحلية سيساهم بشكل كبير في عملية التطوير التي نقوم بها، وأتمنى أن يقوم البرلمان بالنظر إلى قانون المحليات في دورة انعقاده المقبلة.
2- مجلس الشيوخ يعتمد في الأساس على عنصر الخبرة، والذي يتوافر في الإنسان بعد فترة من العمر، ولا يتوافر في مرحلة الشباب.
3- تطور الصراع بين إيران وأمريكا إلى التدخل العسكري سيؤثر بشكل كبير على الشرق الأوسط، ونحن كدولة نسعى دائمًا للحلول السلمية البعيدة عن الشكل العسكري.
4- إجراءات الإصلاح الاقتصادي ستنتهي هذا العام، ولكن الإصلاح في حد ذاته مستمر ولن يتوقف.
5- نتحرك بشكل فعلي إلى الأمام في كل المجالات، ولكن تلك الحركة تحتاج إلى الوقت حتى تظهر.
6- الإرادة تصنع كل شيء، أعدكم أن نحقق ما نتمناه في كل المجالات.
7- آليات العمل الصحيحة هي التي تصنع الفارق الحقيقي بين الدول المتقدمة ودول العالم الثالث.
8- رغم هزيمتنا في كأس الأمم الإفريقية، إلا أننا استفدنا بشكل كبير من عملية التنظيم المشرفة، والتي أبرزت ضرورة عودة الجماهير للملاعب.
9- لن نسمح بمجاملات في أي قطاع من القطاعات ولن نتهاون إذا حدث ذلك.
10- حققنا إنجازات عديدة في مجال الغاز الطبيعي خلال الفترة الماضية، جعلتنا نصل إلى مرحلة الاكتفاء الذاتي.
11- أولى الخطوات التي اتخذناها منذ خمس سنين لإصلاح التعليم الجامعي، كانت التوأمة بين الجامعات المصرية الجديدة والجامعات العريقة ذات التصنيف المرتفع في العالم.
12- تطوير ملف النقل يحتاج إلى مليارات الجنيهات، ولكننا قطعنا شوطًا كبيرًا به، ستظهر نتائجه خلال العامين المقبلين.
13- نحتاج إلى أن العمل أكثر، بالعمل وحده سنستطيع أن نتجاوز كل الظروف الصعبة.
14- نعمل على قدمًا وساق حتى أنه ليس لدينا وقت لافتتاح المشاريع المُنجزة خلال الفترة الماضية.
