كتب – عاطف عبد الستار
افتتح الرئيس عبدالفتاح السيسي، اليوم، عدة مشروعات قومية بجنوب سيناء والسويس. وشملت: الرصيف البحري لشركة سوميد، ومشروعات كباري وإسكان في منطقة الطور وأبوزنيبة، وطريق على قناة السويس وكوبري الجيش المصري بمدخل السويس، وافتتاح المرحلة الأولى من طريق خدمة المحاجر، من نفق المشير محمد علي فهمي حتى طريق السويس وزعفرانة، والنفق شرم الشيخ ومشروعات خاصة بالحديد والصلب.
وجه الرئيس السيسي عددا من الرسائل المهمة اليوم، اهمها أن ترسيخ الاستقرار في الدولة هو أساس البناء والتعمير.
الاستقرار أساس التقدم
رفض الرئيس عبدالفتاح السيسي كلمة وزير الإسكان، التي قال فيها إنّه جار تنفيذ شبكة الطرق طبقًا لتوجيهاته، مرجعًا إياها إلى جهود الحكومة والأنظمة السياسية التي سبقته.
وأضاف السيسي خلال كلمته في افتتاح عدد من المشروعات القومية بنطاق محافظتي جنوب سيناء والسويس: “دي دولة بتشتغل ومخططة ومنظمة، بس إحنا قدرنا ناخد جزء من المخطط ده ونعمله، حتى بما فيها المدن الجديدة، مش بندافع عن حد، لكن عاوزين نفهم اللي بيسمعونا إن الدول بتبقى فيه أجهزة بتخطط لها، وبتهدف إنها تبني دولة بجد”.
وتابع الرئيس: “الفرصة موجودة ليكم يا مصريين بحاجة واحدة، مش بإرادتنا، إرادتنا تصطدم بعدم الاستقرار، لو في إرادة إننا نبني ونعمر ومفيش استقرار مش هيحصل، وأنا بقول الكلام ده مش عشاني أنا، لكن عشانها هي، هي مصر، طول ما الأمور مستقرة نقدر نعمل قد اللي بنعمله عشرات المرات”.
إللى قلبنا عملوا تخطيط الطرق.. واحنا نفذنا
قال الرئيس عبدالفتاح السيسي، إنّ الخطة القومية للطرق والتجمعات العمرانية موجودة في الدولة المصرية قبل توليه حكم البلاد.
وأضاف الرئيس، خلال كلمته في افتتاح عدد من المشروعات القومية بنطاق محافظتي جنوب سيناء والسويس: “موجودة من قبل، يا دكتور عاصم مش عاوز أقول للناس إن دي توجيهات، عاوز أقولكم إنها موجودة في الدولة المصري قبل إحنا ما نيجي، والدكتور عاصم عارف كده والدكتور مصطفى عارف كده، مش توجيه، عشان اللي قبل مننا عملوا شغل كتير وتخطيط كويس، لكن كانت محتاجة تتنفذ، الكلام ده مش نتاج وجودي في الوظيفة”.
وجاء ذلك خلال مقاطعته كلمة وزير الإسكان، الذي قال إنّ العمل جار لتنفيذ شبكة الطرق القومية على أعلى مستوى، التي يتم العمل عليها بناءً على توجيهات رئيس الجمهورية.
مصر ستتقدم في التعليم والصحة والحوكمة ومكافحة الفساد
حذر الرئيس عبدالفتاح السيسي من الفوضى، قائلا إنّ الرغبة في البناء والتعمير لا يمكن ترجمتها على أرض الواقع دون الاستقرار.
وتابع: “أنا بقول الكلام دا ليكوا ومافيش حاجة، البلد زي الفل، أنا بقول علشان الحاجات دي ما تغيبش عن عينينا أبدا، الاستقرار والأمن، بيبقى فيه نوايا طيبة، تقدر النوايا دي بقى تترجم لعمل وناس تشتغل والدنيا تتغير، وعلشان البلد تقوم وتبقى ليها فرصة تاخد مكانها بين الأمم”.
وأضاف السيسي خلال كلمته في افتتاح مشروعات قومية بنطاق محافظتي جنوب سيناء والسويس: “بيتقال النهارده إن مصر تقدمت 90 مركز في الطرق، وهنتقدم أكتر مش بس في الطرق، لكن في التعليم والصحة والحوكمة ومكافحة الفساد، وفي كل شيء، لكنه مرتبط بالاستقرار”.
وواصل: “يمكن ترجمة النوايا الطيبة إلى عمل، والناس تشتغل والدنيا تتغير والبلد تقوم ويبقى لها فرصة تاخد مكانها وسط الأمم”.
وأكد: “بالنسبة للطرق، فاللي موجود كانت مخططات موجودة وإحنا جتلنا الفرصة إننا نطلعها ونعيد صياغتها ونطورها وننفذها وهننفذها، وقد ده عشر مرات وبكرا تشوفوا”.
يعاتب وزير النقل .. ويؤكد: لا تهاون في العمل
عاتب الرئيس عبدالفتاح السيسي، وزير النقل، بسبب طول الفترة التي استغرقتها أعمال المرحلة الأولى من طريق خدمة المحاجر، قائلا: “مش قلنا إننا هنمد الطريق ده لغاية الـ…”، ليقاطعه وزير النقل قائلًا: “دي سيادتك المرحلة الأولى فقط، كانت فيها نزع ملكية وبتكمل دلوقتي”.
وأضاف السيسي خلال كلمته في افتتاح عدد من المشروعات القومية بنطاق محافظتي جنوب سيناء والسويس، معاتبا وزير النقل: “الكلام ده بقاله سنة”، ليعقب الأخير: “حاضر يا أفندم، خلال 3 شهور هنخلصهم”.
بنية تحتية قوية لتشجيع الاستثمار
علق الرئيس عبدالفتاح السيسي، على استعراض وزير الإسكان جهود الدولة المصرية في إنجاز طريق “وصلة أم قمر”، قائلا: “الناس ممكن تتصور إن مفيش حركة عليها، يا ريت نكون صورنا ده وورينا حجم العربيات والحمولات الثقيلة اللي بتستخدم الطريق ده، من المحاجر لغاية مناطق استخدامها في القاهرة، وحجم العربيات اللي بتتحرك من طريق السويس القاهرة إلى طريق الإسماعيلية القاهرة، اللي هو حوالي 40 كم”.
وأضاف السيسي خلال كلمته في افتتاح عدد من المشروعات القومية بنطاق محافظتي جنوب سيناء والسويس: “لو حضراتكم ترصدوها هتعرفوا إن مفيش طريق معمول عشان يبقى ترف، لأ ده عشان يبقى خدمة وييسر على حركة النقل في مصر، اللي بنعتبرها بداية الاستثمار الحقيقي ونكون في مستوى تاني من النمو”.
سرعة في إنجاز المشروعات القومية
تساءل الرئيس عبدالفتاح السيسي عن موعد انطلاق المرحلة الأولى من أعمال مدينة السويس الجديدة، خلال افتتاحه عددا من المشروعات القومية بنطاق محافظتي جنوب سيناء والسويس، وردّ عليه وزير الإسكان، قائلًا: “الأعمال المساحية جارية بالموقع وتم إعداد المخطط الاستراتيجي، وعرضنا عليكم البدائل الموقعية منذ شهر، وتم إعداد دراسة الجدوى الاقتصادية التي شرحناها سريعًا، ويتم الآن بالتزامن أعمال الرفع المساحي وأعمال المخطط الاستراتيجي”.
وقاطعه الرئيس السيسي، قائلًا: “يعني المرحلة الأولى من المدينة؟!”، ليرد عليه وزير الإسكان: “بداية من العام المالي المقبل”.
وواصل السيسي، موجهًا حديثه لوزير الإسكان: “يعني إحنا يا دكتور بناخد الفلوس بتاعة المدن الجديدة من الموازنة العامة؟”، ليرد عليه وزير الإسكان: “لأ يا فندم، من موازنة هيئة المجتمعات العمرانية الجديدة، إحنا هيئة اقتصادية لا نحصل على أموال من موازنة الدولة، وبداية من 1 يوليو المقبل، هنبدأ أعمال المرحلة الأولى”.
ليرد رئيس الجمهورية: “لأ ده كتير أوي، إحنا متأخرين يا دكتور، يعني هنخلص المرحلة الأولى في سنتين بحلول 2022؟”.
الدولة يجب أن تحمي وعي المواطنين
حذر الرئيس عبدالفتاح السيسي من الشائعات، مطالبًا المسؤولين بأداء دورهم في مخاطبة الرأي العام والتأثير على المصريين، ومشددًا على أنّ الدولة يجب أن تحمي وعي المواطنين.
وقال رئيس الجمهورية خلال افتتاحه عددا من المشروعات القومية بنطاق محافظتي السويس وجنوب سيناء: “كل مسؤول وهو بيفتتح مشروع لازم يعدي على حتة الوعي ويتكلم فيها، الناس مش هتزهق، عاوزة تبقى دايما متطمنة”.
وأضاف الرئيس: “وأنا بقولكم يا مصريين، عاوز أحلف لكن ميصحش الموضوع ده يتكرر تاني، اللي بيتعمل أو اللي اتعمل خلال الـ5 سنين اللي فاتوا ميتعملش في 20 سنة، مش أنا اللي عملته ولا الحكومة دي شركات مصر، المشروعات دي بتوفر 5 مليون فرصة، لولا المشروعات دي الناس كانت هتعيش منين، واللي رجعوا من ليبيا مليون ونص مصري ياكلوا منين؟”.
وأردف: “طب إحنا هنفضل كده على طول، ممكن نخلص على 2052، نبني ونعمر ونصلح وننتج عشان الناس تعيش، محدش هيقدر أبدًا يوقفنا”.
وأضاف: “كلنا محتاجين نتكلم كتير، والإعلام يتحدث كثير، عشان نقول للناس يا جماعة يا مصريين متخلوش حد أبدًا، زي ما القرآن قال فسحروا أعين الناس، يعني خدعوهم وضحكوا عليهم ويشوهوا الحكاية، وإحنا كلنا مسؤولين مع بعض إن الدولة تبقى هي الحامي المدافع عن وعي المصريين، عشان ملاحظ إن بقالنا شهور بيحاولوا كل يوم 1000 و2000 شائعة وتكذيب وتحريف وإفك، والناس بسيطة ومعذورة ومشغولة في حياتها اليومية، فمش هيدقق في كل اللي بنتكلم فيه”.
توفير فرص العمل وتشجيع القطاع الخاص على التصنيع
خاطب الرئيس عبدالفتاح السيسي، شركات ومصانع الخاص، وطالبها بتصنيع بعض أجزاء محطات التحلية التي تعتزم الدولة المصرية تدشينها، للتغلب على أزمة الفقر المائي.
وقال السيسي خلال كلمته في افتتاح عدد من المشروعات القومية بنطاق محافظتي جنوب سيناء والسويس: “بالنسبة لمحطات التحلية، جزء كبير جدًا من مكونات محطات التحلية بنجيبه من الخارج، أنا بقول للقطاع الخاص إن في صناعات كثيرة فيها فرصة بمصر، وعندكم فيها فرصة لو خدتوا الإرادة، النهارده مش هقولك اعمل كل المكونات”.
وأضاف: “اعمل جزء منها لأن الموضوع ده معانا، وبالفعل فيما يخص المياه والطلب اللي عليها، بنتكلم في 500 متر للإنسان في السنة، وده يعتبر فقر مائي، وكده كده لازم نتوسع في محطات المعالجة والتحلية، وبالتالي الصناعة دي لو موجودة في مصر، هتبقى عندها فرصة إنها تلبي وتشتغل لمطالب السوق المصري”.
وتابع: “المحطات دي بيتعمل لها صيانة، فعاوزة قطع غيار ومواد خاصة، القطاع اللي محتاج مننا كلنا دولة ومواطنين وقطاع خاص ومستثمرين وبنوك هو الصناعة، ده اللي لسه مخدش فرصة اللي بنتمناها لأن ده هيدي فرص عمل مستقرة لعدد كبير من المواطنين”