اتجوز من الجيران عشان لو طلقت تبقى شايف عيالك في الشارع وشايف النكد في البلكونة اللي قصادك ليل ونهار يعني باختصار وفر على نفسك أجرة المحامي وادفعها في دروس خصوصية لضميرك
اسمع مني يا ابن الحلال لو ناوي تتجوز وتضمن لنفسك دراما مجانية مدى الحياة فالحل مش في مكاتب الزواج ولا في التطبيقات الحديثة ولا في توصيات الأهل الحل في الجغرافيا تحديدا في الشقة اللي قصادك أو العمارة اللي جنبك لأن الجواز من الجيران هو الاستثمار العقاري الوحيد اللي أرباحه كلها خساير بس خساير مضمونة ومكشوفة قدام عينك كل يوم، يعني بتتجوز وانت عارف النهاية السعيدة اللي هي مش سعيدة ولا حاجة بس على الأقل نهاية واضحة المعالم.
بتبدأ الحكاية لما تقول لنفسك البنت دي مؤدبة وبنت ناس وأمها بتطبخ محشي يجنن وبلكونتهم لازقة في بلكونتنا يعني توفير في المواصلات والهدايا والزيارات وتقنع نفسك إن ده اسمه نصيب وذكاء اجتماعي وتخطيط استراتيجي للمستقبل.
بس الحقيقة إنك بتوقع عقد إيجار مفتوح مع النكد وبتمضي على شرط جزائي اسمه الذكريات هتقولي طب وبعدين هقولك بعدين هو اللي يخوف بعدين ده اللي بيبدأ لما تختلفوا وتقرروا الطلاق وهنا بقى تظهر عبقرية الفكرة الجهنمية دي لأنك مش هتحتاج محامي يجيبلك رؤية ولا تتحايل على القانون عشان تشوف عيالك لأن عيالك كده كده بيلعبوا في الشارع اللي تحت شباكك وهتسمع صوتهم وانت بتفطر وتتغدى وتتعشى وهتشوف طليقتك وهي بتنشر الغسيل في البلكونة وهتشوفها وهي بتتخانق مع مراتك الجديدة في نفس البلكونة برضه لأن المسافة بينك وبين الماضي بقت متر ونص بالظبط وهتبقى مراتك الجديدة كل يوم تصحى تلاقي التاريخ بتاعك واقف في الشباك اللي قصادها بيشرب قهوة وبيبص عليها بصة فيها شمتانة وشماتة وحنين وكل المشاعر اللي ما لهاش اسم وهتضطر تتعامل مع الموقف ده بحكمة وصبر وهتصرف كل الفلوس اللي كنت هتديها للمحامي على دكاترة نفسيين ليك ولمراتك وللعيال وللجيران.
كمان لأن الجو في العمارة هيبقى متوتر أكتر من اجتماع مجلس الأمن وهتكتشف إنك ما وفرتش حاجة بالعكس انت فتحت على نفسك باب جهنم بريموت كنترول في إيد طليقتك اللي كل ما تتخانق معاك ترمي كلمة من البلكونة توصلك لحد سريرك وتخلي مراتك الجديدة تطلب الطلاق هي كمان وبكده تبقى دخلت التاريخ كأول واحد يطلق مرتين في نفس المربع السكني وفي نفس السنة المالية وساعتها هتفهم إن الجواز من الجيران مش توفير ده موقف مغلف بورق سوليفان اسمه القرب وإن الضمير اللي كنت هتديه دروس خصوصية ده خلاص سقط في كل المواد وبقى محتاج معجزة مش درس وإن أحسن حاجة تعملها دلوقتي إنك تعزل وتسيب المنطقة كلها وتروح تتجوز من محافظة تانية خالص وتبدأ من جديد.
بس المرة دي اختار واحدة ساكنة في قارة تانية عشان تضمن إن النكد على الأقل هيحتاج تأشيرة وباسبور عشان يوصلك.
ياسر السجان يكتب: كيف تفتح باب جهنم بريموت كنترول؟