طاهر إدريس يكتب: ميكروباص فيصل – التحرير.. تقطيع الطريق سبوبة منظمة
اللي بيحصل كل يوم على خط فيصل – التحرير مبقاش مجرد مخالفة مرورية بقى نظام بلطجة كامل على حساب الغلابة.
الميكروباص المفروض يطلع من موقف فيصل لحد التحرير بأجرة واحدة موحدة. اللي بيحصل على الأرض حاجة تانية خالص السواق يقطع الخط كل 3 محطات ويقلبها 3 مواصلات بأجرة جديدة يركبك من فيصل آخر فيصل يقولك الطوابق آخرنا تنزل الطوابق أو نكمل للطالبية بأجرة جديدة وهكذا ومن الطالبية للدقي ثم التحرير تدفع عشان توصل مش عاجبك أنزل يا باشا نفس العربية بنفس السواق من التحرير لفيصل نفس الفيلم.. آخرنا الطالبية، آخرنا المطبعة، آخرنا المساحة. الراكب اللي رايح شغله بيدفع مرتين وتلاتة وأربعة، واللي مش عاجبه يتقال له “انزل”.
الموضوع حسابي بحت. أجرة الخط الكامل لو التزم بيها 10جنيهات ونصف مثلاً، لو قطعه 3 محطات كل محطة 6 جنيهات هيعمل 18 جنيه في الفردة الواحدة. ضعفين ونص المكسب. وده اللي بيخلي السواقين يتفقوا مع بعض على التقطيع، خصوصاً في ساعات الذروة الصبح ووقت خروج المدارس وبليل، وقت ما الناس مضطرة ومفيش بديل.
والحجة الجاهزة: “البنزين غلي”، “المرور زحمة”، “الدور بيخسر”.
والحقيقة ان الزيادة الرسمية للبنزين الدولة بتحط قصادها تعريفة جديدة، مش من حقك تفصل تعريفة على مزاجك.
الدولة شايفة وبدأت تتحرك محافظة الجيزة نفسها أعلنت من أيام إنها تلقت شكاوى المواطنين المترددين علي موقف السرفيس بمحيط مترو جامعة القاهرة من قيام سائقي الميكروباص خط فيصل بتقطيع خط السير وعدم الالتزام بالتعريفة المحددة وقامت حملة برئاسة جهاز السرفيس وسحب تراخيص وغرامات مغلظة لكن نحتاج المزيد ونحتاج موظفين في السرفيس عندهم ضمير
ونفس السيناريو بيتكرر في كل مصر، الداخلية بقت تضبط سائقين اعترفوا أنهم بيقطعوا المسافة لتحقيق أرباح مالية والحصول على أجرة أزيد من المقررة وفي حالات تانية بيتم فرض غرامة فورية 1000 جنيه ووقف السيارة عن العمل.
نفس الشئ علي الدائري وما ادراك ما الدائري يعني القانون موجود: سحب رخصة، غرامة، وقف خط سير. بس المشكلة إن الحملات موسمية، يومين وترجع ريما لعادتها القديمة.
الضحية معروف وهو الموظف اللي بياخد 4000 جنيه في الشهر وبيدفع 40 جنيها مواصلات رايح جاي بعد التقطيع بدل 10 جنيه ونصف الطالبة اللي بتتأخر على محاضرتها عشان كل 3 محطات بتنزل تتخانق.
الست الكبيرة اللي مش قادرة تنط من ميكروباص لميكروباص.
التقطيع مش بس سرقة فلوس، سرقة وقت وكرامة. لما سواق يقولك “عاجبك ولا مش عاجبك” ويجبر الركاب ينزلوا في نص الطريق دي بلطجة مواصلات.
يا جماعة الحل مش مستحيل الحل سهل جدا وهو:
تسعيرة ملزقة على العربية كل ميكروباص يتعلق عليه استيكر كبير من المحافظة بالخط والأجرة وخط شكاوى. زي ما اتعمل قبل كده.
كمين ثابت مش متحرك مش حملة يوم وتخلص. كمين ثابت عند جامعة القاهرة وعند كوبري الجيزة، وشارع فيصل أي عربية تقطع يتسحب ترخيصها فوراً لمدة شهر.
شكوى بتصور أي راكب يصور النمرة ويبعتها على صفحة محافظة الجيزة أو على منظومة الشكاوى الصورة دلوقتي هي اللي بتحرك الدنيا كل الضبطيات الأخيرة جت من منشورات مدعومة بصور على السوشيال ميديا.
بديل محترم: خط فيصل – التحرير من أكتر الخطوط كثافة في مصر. لو دخل عليه 20 ميني باص تابع لجهاز النقل الجماعي بأجرة موحدة وكارت ذكي، جشع الميكروباص هينكسر لوحده.
الخلاصة: تقطيع الطريق على خط فيصل – التحرير مش فهلوة سواق، دي منظومة استغلال كاملة بيدفع تمنها المواطن الغلبان مرتين: مرة من جيبه، ومرة من أعصابه. والحل مش في إننا نطبطب على السواقين، الحل في رقابة يومية حازمة تخلي اللي يفكر يقطع الطريق يعرف إنه مش هيروح بيتهم بعربيته في نفس اليوم.
طاهر إدريس يكتب: ميكروباص فيصل – التحرير.. تقطيع الطريق سبوبة منظمة
