نادية البسيونى تكتب : عصفور تريك
عصفور تريك
عصفور تراك
كانت خطاوى الشوق وراك
شوق الحكاوى الطيبة لحضن الغيطان
والشمس ترمى حِملها آخر النهار
ملهوف عليك الانتظار
لهفة قلوبنا للطواف المستجار
والنور مطاف
والليل فى عين الصبر طال
ما القلب كان مقفول عليك
زى النواية فى الثمار
وحدك شراع
والعشق داير فى البحار
مشتاقة ليك
والفرقة مش ملمس حرير
الفرقة بير قايد بنار
والديك بيدَّن :
يا بشر
حطوا الستار
لما افترش فيروس كورونا بقسوته سطح الجدار
المسرحية اتهلهلت
والكون مدار
بيقولوا مارس لعبته بحُب وهذار
بيقولوا قايم فى البلاد ياخد بتار
ويقولوا مستقصد صغار
ويقولوا هالك للكبار
قافل حدود الشوق ما بيننا بالقرار
ورد المواسم فى انحظار
والماء طهور
يطفى شرار الاحتقان
ولحد ما يعود النهار
يفتح علينا ربنا مليون ستار
