منوعات

بنضحك علي الأيام..قصيدة للشاعرة :ضيا طحاوي

بنضحك علي الأيام
لتسرق منا فرحتنا
ونعمل سد للأحزان
ونداري بلمتنا
وننسي همومنا بمزاجنا
ونرمي حمولنا ع الخالق
لا نتسابق ولا شاغلنا
مين الكسبان هنا إمبارح
ولا بكرة نشوفه ازاي
طالما شوفنا بعنينا
وجوه من روحنا حولينا
تراب الأرض غطاها
وجفن العين ما لاقي دموع
وراح القلب وياها

ما عاد فارق بيحصل إيه
ولا بيهم إيه الجاي
كرهنا عيشة التخويف
ورعب بيوتنا ع الهامش
مفيش أقدار معدية
بنهرب ليه ورا أوهام
دي أحكام صادرة وقوية
ما منها مفر هنخاف ليه
سلم للسما أمرك
وإرضي منه بالحكمة
ولا هاينقص بيوم عمرك
عشان مكتوب علي جبينك
تخطي الخطوة بحسابه
تتوه في الدنيا وتعافر
تروح تجري علي بابه
يطمن بالهنا قلبك
بلاش تتغر وتعاند

يا ويلك منه بعذابه
ده مسطور كله بكتابه
وبنضحك علي الأيام
لتسرق منا فرحتنا
ونعمل سد للأحزان
ونداري بلمتنا

شاهد أيضاً
إغلاق
زر الذهاب إلى الأعلى