داليا شرارة تكتب : درس النهاية

العجلة دايرة في كل شيء في الكون
والعجلة عندي واقفة ما بتمشيش..
بغرس بذور الأمل واستنى فجر جديد
واسقيها من روحي
الأرض تصبح بور..

مديت إيديا وقلت اسند لقتني وقعت
الحيطة مهدودة ووجودها وهم كبير..
لميت خيوط النور وقلت اغزلي حلم جديد
ضاعت خيوط الصبر وسط عتمة ليل..

أنا والأمل ضدين
أنا والألم صنوان
أنا والعذاب رفيقين
وثالثنا كان حرمان
بلعب قمار فردي والدفع فيه فوري

قدمت من دمعي وخسرت من بدري
كمّلت سِيري.. والوِجْهة مجهولة
كان الطريق مقطوع.. والرؤية معدومة
قلت الغلط كان فين
وحصل في أي طريق؟!!
عدت حياتي شريط
معرفتش ألقاني
معرفتش احذّرني
مِ اللي هيجرالي
تاه الطريق منّي
سَفّ الشريط مِ النُّص
كان البداية حياة
ونهايتي كانت درس
ما تعيش أي حياة
ما تكونش بيها خبير
هتلاقي نفسك طير
وقصقصوا جناحه.