وسام الجمال يكتب : بلقاس و لعبة الانتخابات
اشتدت التكهنات علي صفحات التواصل الاجتماعي مع بعض النصائح للمرشحين المحتملين سواء الحاليين أو ممن أعلنوا ترشحهم أو ممن أراد المواطن ترشيحهم حتى ولو ضد رغباتهم.
لكن المثير للجدل هو أنه لا أحد ممن اعلنوا الترشح أو أعلن عن نيته واضحا حتى الان وانما هي تكهنات غالبا لن تكون صحيحة خاصة مع عدم إصدار الهيئة العامة للانتخابات بيان رسمي بشكل الانتخابات القادمة حتى الآن.
لكن على مين المواطن صاحي وعارف كل حاجة تارة يقسموا دائرة بلقاس بلدى الي شربين وبلقاس وبسنديله والستاموني وجمصه. وأخرى يحذفوا شربين ويضعوا طلخا وأخرى يحذفوا شربين وطلخا ويبقوا على حدود مركز بلقاس.
والغريب أن تجد من يرد بقوله استني يومين واجيب لك الخبر اليقين وكأنه رئيس الهيئة العليا للانتخابات.
ماعلينا تعالوا نشوف المصيبة الأكبر هو حضراتكم علي اي اساس رشحتم فلان أو علان فيه ليه برنامج انتخابي انا كمواطن اقدر اعطيه صوتي من خلاله طيب لو هو عضو سابق ايه إنجازات سيادته علشان أديه صوتي تاني.
ماتيجوا نلقى نظرة كده منذ بداية الحياة النيابية بلقاس أكبر مركز بالدقهلية ليس بها معهد عالي أو جامعة تابعة للدوله فيه قرى في الدقهلية فيها ذلك.
بلقاس بها شركة مضارب دمياط وبلقاس ومصنع الدقهليه للسكر اغلب موظفيهم من خارج مركز بلقاس.
استني حفير شهاب الدين منطقة استصلاح واستزراع اغلب ملاكها من خارج بلقاس.
ياعم انت بتقول ايه معقول لا استني كمان بلقاس عدد سكانها قارب على نصف مليون إنسان عدد أعضاء نادي بلقاس اعتقد ٣او ٤ آلاف وماتقوليش العضوية مفتوحة لا أنسى ده كلام زمان كانت قرية الشوامي هي الجمعية العمومية
استني فيه إنجازات انت هاتهزر اه قصدك الرصف طيب بذمتك ده شكل رصف ينفع ياراجل عيب بجد.
ببلقاس منكوبة وستظل بلقاس التي يقع في نطاقها بترول بلاعيم ابو ماضي لسه داخل لها غاز العام ده وأغلب موظفي الشركة برضه من خارج المركز باستثناء العمالة الموقتة.
وحياة أغلى حاجة عندكم بلاش ترشحوا حد سيبوها لوقتها لسه بدري وقبل ماتنتخبوا حد بصوا لمصلحة البلد ياريت يصدر قانون بأن من ربح دورة أو عين دورة يكتفي بهذا ويترك المجال لغيره.
