كلية تربيه رياضية تتنمر على طالب : شفتك مبوظه شكلك !
موقف غريب تعرض له طالب من كفرالشيخ تقدم لاختبارات كلية التربية الرياضية ، الا أنه حدث معه ما لم يكن يتوقعه ، شيئ يدعوا للتعجب والاستغراب ! “شكله وحش ” لايليق ان يكون طالبا بين طلاب كلية التربية الرياضية خوفا على مشاعر الطلبة ،ام استهانة واستهزاء من القائمين على لجان الاختبارات ؟
الاغرب ان هناك اشكال واحجام واوزان لاتصلح ان تقبل فى محل كشري تم قبولها، هل الاختبارات بنظام الكوسه ام هناك اعتبارات اخرى للقبول ؟
يقول الطالب احمد عمر توجهت فى الساعة التاسعة صباحا إلى الكلية لأقدم الاوراق وادخل الاختبارات ،وقعدت انزل واطلع من الساعه ٩ صباحا حتي الواحدة ظهرا وبعد ذلك مكثت ساعة حتى دخلت، ودفعت ٤٥٠ جنيها الأول غير الورق اللي صورته وبعد كدا دخلت وقلعت” بلبوص ” ماعدا البوكسر
وبعد كدا قست الطول والوزن وطلع مناسب جدا وبعد كدا رحت للدكتور التاني عشان الاختبار.. انزل عشره ضغط.. أقف على مشط رجلك ونط.. اقعد واقف وانت مربع من غير ما تسند وبعد كدا قال لنا ننزل الكمامة وبعدها لقيت نظراته ليا اتغيرت وقعد مركز معايا شويه ومركز في شفتي اوي، بعدها ندهلي قالي اسمك ايه قولتله احمد عمر يادكتور قالي ايه اللي فى شفتك دا.. قولتله عمليه حضرتك وبعد خمس شهور بالكتير هعمل عملية تانية وشفتي هترجع طبيعية وهشيل التقويم وهبقى زي الفل،
فقال لي طب ارجع تاني وقفت مع زمايلي فلقيته قالهم روحوا انتم للخطوات اللي بعد كده وقالي أقف انت عاوزك.. طبعا انا استغربت.. اللي هو فيه ايه وبعدين بصلى بصات غريبة بعد ما ذنبني شويه قالي تعالى.. فروحت قالي روح البس هدومك وروح!
قولتله ليه يا دكتور دا انا حتى لسه ما دخلتش اختبار الجري ولا حتى الخطوات اللي بعد كدا.. قالي انت شكلك مينفعش.. قالي عشان مصلحتك بس قولتله الكلية كلها حركه وجرى وسباحه ولو في بوكس وملاكمه انا هدخل فيها بقول لحضرتك انا بعد خمس شهور كل دا هيبقى زي الفل ،
قالي انت شكلك اصلا مينفعش يبني وبعد كدا قالي يلا اتفضل روح البس وروح، الغريب انه كان معاي زميل لا يقل عن ١٢٠ كيلو واتقبل عادي… نزلت سألتهم وقولتلهم عاوز ال٤٥٠جنيها بتوعي عشان امشي لاني لسه حتى مدخلتش الاختبارات ولا عملت اي حاجه يعني دفعتهم على الفاضي الاقي الأمن يقولي بح ياباشا كان فيه وخلص مينفعش تاخدهم تاني،
طلعت لحد مهم فوق فى مكتبه قالي طالما كتبت اسمك على الظرف يبقى متعرفش تاخدهم.. قولتله تمام بس انا اصلا مدخلتش الاختبارات يعني لو دخلت اوك إنما أنا مدخلتش.. بس على كلامه انه ميقدرش يعمل شئ نزلت وانا مش مسامح فى الفلوس طبعا،
اللي موتني أن انا ليه متقبلتش.. علشان شكلي مش لايق على الكليه على كلام اللي كان فوق فى الكشف الطبي.. يعني انا قبيح.. انا وانا طفل ياما خدت تريقه و اتعنصرت عنصره هدت امالي وطموحاتي في حاجه انا مليش ذنب فيها والله مش انا اللي خلقت نفسي عشان اكون وحش !
اما يعد ذلك تنمرا يعاقب عليه القانون ؟ ام انها لجنة للاختبارات تستهزء بالطلاب كما تشاء ؟
Yoast
