ايهاب عمر يكتب : لعبة التريند وتوجيه الرأى العام المصري
المصريين يقرأون الشائعات على انها حقائق تاريخية لا تقبل المنافشة ، و آفيهات الاراجوزات على انها تحليلات سياسية مهمة ، و الحقائق التاريخية على انها وجهة نظر.
الرأى العام المصري مش مهتم بـ كورونا ، رغم توسلات الحكومة المصرية للشعب انه ياخد باله عشان، وهذا يرجع لان تركيا غير مهتمة ولا محتاجة القطيع المصري فى حاجة.
لكن لما كانت كورونا فى تركيا قبل مصر، سرحوا اللجان يقولون لك مصر عندها كورونا و مخبية.
لما اعداد كورونا فى تركيا كانت الاكبر فى المنطقة كلها، قالوا لك مصر اكتشفت كورونا بس الاعداد اكبر من المعلن.
صمدنا ؟ اضرب اسفينات واشتغل شغل لجان واطلب من الدكاترة يعملوا اضراب عشان توقع النظام الصحي فى زمن كورونا.
تركيا عايزة تقفل؟ يبقى لجان تشتغل على جروبات الماميز اقفلوا الدراسة .. ولجان تطلب اقفلوا قبل ما نكون مثل ايطاليا رقم اتنين واسبانيا رقم تلاتة والحسابة بتحسب.
صمدنا ولسا ارقام تركيا اعلي ؟طب نقول انه مصر مش بتعمل كشف او مسح لكل الشعب ولازم نشتغل مسح عشوائي بيت بيت دار دار زنقة زنقة على امل ارقام مصر تكون اعلي من تركيا وقطر وايران.
الارقام فى مصر بدأت تنزل ؟ لا اكيد مخبيين حاجة طب ازاى تركيا لسا بتزيد ؟
وبالتالى عايز تفهم بورصة الشائعات واسكربتات وديباجات اللجان شوف سيدهم رجب مزنوق فى ايه وعايز يلبسها لمصر.
او بمعني آخر .. عايز تعرف وتتابع اخبار كورونا فى مصر تابع تركيا الاول، كل ما رجب يتزنق هناك هينزل بالرد عبر تنظيم المواطن الاستراتيجي المصري المحنك المسخسخ من فرط الوعي ولعنة الادراك.
وخد بالك انه موجة الشائعات المقبلة ستكون اشد من الاول.. لانه تركيا فى ظل الازمة الاقتصادية الاصعب فى تاريخها واسوا سعر للعملة التركية مقابل العملات الاجنبية ومقاطعة عربية للسلع التركية بعيدا عن عواء مقاطعة سلع فرنسا، كل دا ينبئ انه اقتصاد تركيا داخل شتاء كورونا مرعب وانه موجة كورونا المقبلة هتمسح بالاقتصاد التركي الارض.
خليك فاكر قواعد اللعبة .. شوف رجب مزنوق فى ايه وانت تعرف الترند الجاى فى مصر عن كورونا شكله ازاى.
