مني جلال تكتب :حب من طرف واحد

حب من طرف واحد

انا اسفة ماعشمتكش

وكنت صريحة للاخر

ولا كنتش بالف وادور

ولا كدبتش عليك مرة وقلت لك ..

بإني حاسة جوايا بأي شعور

ولا ضحكتش عليك عمري

عشان الأمر مش أمري

وقلبي في الغرام يشبه

طريق مهجور

وحذرتك كتير جدا

مانيش ليلى ولا عبلة

ولا بشبه بنات الحور

ف لوم نفسك

وعاتب في الهوا قلبك

عشان الذنب مش ذنبي

أكيد الذنب كان ذنبك

ولو ناسي ..

انا فاكرة ومش ناسية

ف من فضلك ..

بلاش نظراتك القاسية بدون أسباب

انا مش حمل أي عتاب

انا طول عمري قافلة الباب

ماليش في الحب م الآخر

ومش عايزة يكون لي احباب

وقلبي في الغرام غاوي

في فصل العشق يتقيد ..

تملي غياب .

ياريت تبعد بقى عني

وتنسى ملامحي وكأني

ولا عرفتك وماقبلتكش

ف لو تسمح ..

بلاش تتعبني وتناهد

مانيش في الحب متهمة

ولا قلبي كمان جاحد

عشان حبك دا كان أصلا ..

بدايته من طرف واحد

وانا في الأصل ماوعدتكش

ف ماتلومنيش انا اسفة

ماعشمتكش .

yoast