هاله العكرمى تكتب :حِب الحياه

حِب البشر.. حِب الحياه

حِب اللي من صُنع الإله

طير أو شجر.. برد ومطر

والحر في الشتا يامحلاه..

حِب الطفولة دي البريئه

اللي ضحكتها رقيقه

رغم احزانها اللي بيها

هي عنوان الحقيقه..

حِب البلد دي بشمسها

ريحة غيطانها وزرعها

وبنيلها حاضن بحرها

وبطينها عاشق رملها..

دي نجمة فوق عرش الجمال

والنسمة دي سحر وخيال

الله علي وقت الغروب

سايق علي حروفي الدلال..

عشمان اوي في محبتك

حِب السمار والجدعنه..

لو جي من قلب الصعيد

أو بحري بجماله العنيد

كل القلوب اهي إيد في إيد

ولا حد فيهم قال أنا..

السر حطه ف بير غويط

وبلاش تبوح بيه لأي حد..

اوعاك تفكر في الوسيط

صدقني راح تندم بجد..

دي نفوس وشاربه من الوهن

ربك معاك ساعة المحن

طول مانت بتحب الوطن

هتلاقي جذر الروح دي مَد..

ضلل علي الطفل البرئ

امسح علي شعر اليتيم..

أو مد إيدك للغريق

وأرسم طريقه المستقيم..

الدنيا واد أهبل عبيط

سحبانا للبحر الغويط

مهما تعيش وتكون حويط

هتسيبها ومفارق ف يوم..

ربك كبير ستار اوي

كاتب علي مُلكه يدوم..

yoast