حبيبي شعر جيهان النجار

أنا آسفة …خلاص توبة
ويابخت القلوب …الخضرا
لما تبقى مغلوبة
بتاخد م الهوي حسنات
بتزرع حب
فبتاخد عشر مرات
تدوب قلبها شربات
فتروي الدنيا من خيرها

ويا بخت القلوب … الخضرا
لما يكون ف تفكيرها
رسول الله
حبيب الحرف والمعنى
نصلى عليه وهو فى قبره يسمعنا
يرد علينا ويسلم
رسول الله فى موته كمان بيتكلم

رسول الله أنا محتاجة
تشفع لي
وتدفع لي حساب الذنب من نورك
أنا يا حبيبي من أهلك
وقلبي اكمنه يستاهلك
فى كل اموره بيشورك

رسول الله ملايكة ربنا صلت
فما بالك بناس تاهت وناس ضلت
وتيجي السيرة متصليش
وبتكسل وراك يا حبيبي ما بتمشيش
وعامل بعضهم دروايش
حبيبي يا رسول الله