ديوان خليك انسان
سيبوا الخلق ياناس للخالق
سيبوا الكون لإله الكون
ليه العالم أصبح فجأه
كله كلام وودان وعيون
دا اللي يبص لعيشة غيره
يبقى أكيد إنسان مجنون
أو مش عادي
يفضل كده على طول مش راضي
نار الحقد بتحرق قلبه
يمشي ف كل طريق ويلاقي
حتى خياله ماهوش بيحبه
بس ان سلّم أمره لربُّه
يلقى ف نفسه وقلبه قناعه
ينسى هموم العالم كله
يهرب م الدنيا الطمّاعه
يلقى الرضا بيزيده مناعه
ويغمّض عن غيره عينيه
حتى ف عز الفقر ح يلقى
كل نعيم الكون حواليه
والخير بكره يزيد ف إيديه
طول ماهو عايش راضي وشاكر
إنما لو رح يصبح ناكر
يلقى الخير اتحوّل شر
يصبح ريشه ف حضن الريح
أو مركب غرقان ف البحر
يفضل كده مش لاقي البر
حتى ان كان البر قُصاده
ضايع بين حسدُه وأحقاده
تايه حتى كمان من نفسُه
دايما يجري ومقطوع نفَسه
والخير جنبه ما يشوفهوش
قالوا زمان أجدادنا ف حِكمه
إجري ان شالله جري وحوش
مش ح تنول غير المكتوبلك
أما الباقي ما توصلهوش
رزقك على وشّك منقوش
مش ح تنول غير هوّ وبس
يعني تسيب الكون للخالق
واوعى ف يوم ع الخلق تبّص
حتى ان كنت ف عز الحوجه
حاول تبقى ..عزيز النفس