منوعات
ايجار قديم .. قصيدة جديدة تكتبها : شيماء الحماقي
سيادة الحبيب
المأجر ف قلبي
قانونك قديم
بنود العقود اللى توصل ما بينا
ملامه وعتاب
بتفرض شروطك
وبشرب عذاب
ياغايب وحاضر
بتأمر واجاوب ب طيب وحاضر
ياريت حتى عاجب
جدار المحبه مملح ودايب
شروطك غريبه
طريقتك ما اظنش طريقه حبايب
وبتغيب وترجع كأنك ماغيبتش
وارمم ف قلبي كإنك ماسبتش
وبنزف قصادك وماتشوفش دمى
واشيل وقت همك وماتشيلش همى
وفرق المشاعر يبان ليه رهيب ؟؟؟
ماعنتش بتعرف تمثل حبيب
هاعيش ع اللى عندى
على الذكريات
ف كمل حياتك منيش أولويه
ف كم المشاكل مفيش حاجه ليا
ده لو كان بإيدى ل خدت القرار
وانذار اخير
يا تملك بقلبى يا هالغى الايجار .
