مش واحدة انا : شعر جيهان النجار

انا مش قصيدة بتنكتب وبتنقري وبس وخلاص
انا سادس الخمس الحواس
انا حد لما يفككوه يطلع بناس
بكتير أوي
يطلع مقاس الحب عرض الجدعنة

وطول والوفا مش واحدة انا
انا كون وقلبه
مااكتفى
من عاشقين
انا أول الحزن النبيل
انا آخر الصبر الجميل
انا نيل بيروي
حلم مصر وأهلها
وبامثل الناس كلها
انا عضو مجلس حضرته
وعندي حصانة بنظرته
انا دايرة الشوق الحلال
انا بنت خال الحب وحياة النبي
فاهمة يا دنيا…. بتكتبي؟

اتكي جامد ع الحروف
اوعي تسيبي أي معنى للظروف اتأدبي
انا مش قصيدة
وفكرة وشوية حروف
انا نصي خوف
أما اللي باقي مذهبي
فقه الأمل
وشويتين نور محتمل
انا وردة شوكها
من رضا….
وحبة ندا
ونهار جديد الله أعلم باللي فيه
انا حاجة حلوة
وربنا
انا معني حلو… الله عليه
Yoast