عبدالشافي عصام يكتب :انا امي وحشتني

خَسْرَانْ ياربْ
فـ حَربْ مِشْ حربي
عَاشِقْ لسِم البشَرْ بيجِزُوا مِن قُربِي
وَقتْ اما قولتْ الـ “واء” اتْلَفُوا حَوَاليَا
سِتي تبُوسْ الخَدْ تِفْرِدْلي رِجْلَيا
الكُلْ حَوَاليا
وَ ابُويَّا مِن فَرحِتُه
بـ يبُوسْ عينِينْ امي
وِلْدِتْ خَلاصْ بِذْرِتُه
شِيل الوَلا وسَمي
نَسلَكْ خَلاصْ اتْمَدْ
فـ الدنيا اوعىّ تخَافْ
إبْنَك فـ وقت الجَدْ
هيكونلَكْ الخُطَاف ْ

تصطاد عدوكْ بِيه
زَود فـ قُربك لِيه
بَلاش تسِيبُه وَحِيدْ
اوعَاكْ تسِيبُه وَحِيدْ
والعِيدْ فـ انُه يكونْ
ظَابِطْ ..بَلاَشْ دُكْتُور
خَليكْ فـ ضَهرُه صبور
جَامِدْ ومَبْتِعطَلشْ

العُمر سَقفُه مَطَالشْ
انُه يسَاعْ امي
اخِرْ نَفَس مِنْها مَشَطلي شَعري حَنَانْ..
خَلاَني مَنْسِتْهَاش
مع إني معرفهاشْ !!
فَاكِرْ صُورِتها طَشَاشْ ..
وَلكَنِي مَنْسِيتْهَاشْ
حَاسِسْ بـ شُوق على طولْ
مَعرَفش دايما اقولْ
انا امي وَحَشِتْنِي
مَعْ انِي مَعرفْهَاشْ !
انا امي وَحَشِتْنِي
والله مَنْسِيتْهَاشٔ

على عَتبِة العِشرينْ
ومَازِلتْ طِفل رَضِيعْ
وَضْع حَياتِي وَضِيعْ
من غِير حَنانْ اوْ امْ
ابويا ضَهرْ كبِيرْ
لَكنُه عُمرَه ماضَمْ
ابويا مِشْ قَاسِي
لَكنْ الحَياه بِتهدْ
ابويا وَقتْ الجَدْ
طُولْ عُمرُه يِسْنِدنِي
ابويا وَقتْ الحُزن
مَقدِرشْ يِنْجِدنِي
انا امي وَحَشِتْنِي

مع إني معرفهاشْ !!
ابويا مَتْخَلاَشْ
لَكنِي مِحْتَاجهَا
طوِلتْ على بَابْهَا
و هِيَّ مَبْتِفْتَحْشْ
وانا بَرضُوا مَبَروَّحْشْ
بَحْضُن فـ طُوبْ القَبْر
وَاكِنِي بَحْضُنْهَا
نِفْسِي يطُولْ الصَبْر
ورَبي هَيصُونْهَا
القِصَه مَضْمُونْهَا ..
دُنيا بدونْ الشَمسْ
عَايشَه بَقَالَها سِنِينْ
بتحِن لـ شرُوقها
الدُنيا هَتدُوقها
مَرَارْ على هَمْ
الامْ هِيَّ الامْ
وانْ كان مَالِيها عِيوبْ
الام حُضنْ امانْ
بِتْهَوِنْ المَكتُوبْ
إرجعْ لـ امك تُوبْ
وبَلاش تعَانِدْنِي
إرجعْ لـ امك تُوبْ
ده انا امي وَحَشِتْنِي .