محمد صلاح يكتب : وصية لحجاج بيت الله الحرام

وصيتي لكم قبل مغادرة مكة ، هي ان تجعل لك مذكرة بالهاتف او ورقية تكتب بها كل ( يوميات الحج ) قبل ان تنساها شيء فشيئ فاليوم تتذكره بنسبة 100% وغدا ستبدء في نسيان المواقف فأجعل لك مذكرات حاج

الحج فريضة ربنا سبحانة وتعالي فرضها علي كل مسلم بالغ عاقل وعلشان الحج علي مر السنين والعصور مشقه كبيرة وكل سنة بتتغير عن اللى قبلها بواقع تجربتي بفضل الله اكثر من مرة وبرغم توفير بعض سبل الراحة ربنا سبحانه وتعالي قال ( لمن استطاع اليه سبيلا ) .

فأردت إلاجابة عن تساؤلات كثيرة تدور بمخيلتى .

الحج له طريقين طريق مشروع واخر غير مشروع ربنا يقول ( ولا تلقوا بأيديكم الى التهلكة ) وده لان في فرق كبير بين اللي طالع حج رسمي واللي طالع غير رسمي الإثنين حجهم صحيح

المسافه بين مكة وعرفات تتراوح بين ٢٠ كم الي ٣٠ كم علي حسب شطارتك بقا هتتحرك منين وهتمشي ازاي هتتحرك بالليل ولا بالنهار . وانتم جربتم ذلك بانفسكم

في الحج الرسمي انت عندك وسيلة نقل متوفره في شركة السياحة المسئولة عنك.

في الحج الغير الرسمي انت معرض للنصب من التاكسي ومن باصات التصعيد يعني ممكن تدفع ١٠٠٠ ريال علي الاقل ده كدا يبقا رحيم بيك لباص تصعيد وفي الاخر يسيبك بعد اتنين او تلاته كيلو في الصحرا يبقا حضرتك هتكمل المسافه دي كر وفر من الشرطة ويا عالم هتقدر تدخل ولا لا .. او تاخدها مشي من اولها وخلاص

ربنا كرمك ودخلت عرفات سواء رسمي او غير رسمي وكله بتوفيق من الله واللي ربنا كاتبه هيكون . في الحج الرسمي انت عندك مخيم مكيف ومتوفر فيه جميع سبل الراحه علي حسب باقه الحج اللي انت طالعها بس مهما كان اقل حاجه انت عندك مكان مخصص ليك وعندك طبيب عنده بيناتك وكل شئ عنك ورقم الطوارئ الخاص بيك

الحج الغير الرسمي انت علي الله حكايتك مفيش مكان تقعد تريح فيه بعد رحلة التعب علشان توصل عرفات و الاكل انت وظروفك بقا وشطارتك ووقتها هتتطر انك تجادل علشان الزحام علي عربيات توزيع الوجبات ( باتيه وعصير ) تحت درجة حراره لا تقل عن ٥٠ درجة .

ربنا كرمك وعديت يوم عرفات علي خير بعد تعب وارهاق ودعاء ورايح علي مزدلفه طبعا مفيش في طريقك غير مياه فقط مفيش اكل نهائياً غير وجبات ( عصير وباتيه ) ويا عالم هتقدر تاخد ولا لا بدون جدال علشان حجتك

الحج الرسمي عندك وسيلة مواصلات بتاخدك علي حسب خطه التفويج وبتروح بيك علي مزدلفه وبتوفرلك مكان داخل الحدود تبات فيه ووجبه عشاء وتشحن تلفونك في الباص

الغير رسمي حضرتك هتاخدها مشي من عرفات الي مزدلفه تقريباً ١١ كيلو بعد عناء طول اليوم في الشمس وفي الاخر ممكن متقدرش تبيت داخل الحدود بتاعت مزدلفه والعلماء قالوا ان مرورك من مردلفه يكفي ومفيش في سكتك غير مياه فقط ووجبات بتتوزع لو فيك صحه لسة ادخل جادل علشان تاخد واجبة ( باتيه وعصير ) وتلفونك فاصل مش عارف تتواصل مع حد

بعد صلاة الفجر في مزدلفة هتطلع علي مني لرمي جمرة العقبة تقريبا ٧ كيلو. الحج الرسمي انت عندك حاجتين قطار المشاعر وباصات الحملة معزز مكرم ولو تلفونك فصل هتقدر تشحنه الغير نظامي عندك طريق واحد وهو انك تاخدها مشي او لو ربنا كرمك وطلعت عند الباصات ممكن تركب بمبلغ وقدرة وده بنسبة قليلة علشان تحصل مع حد وتلفونك فاصل

وصلت بالسلامة للجمرة الكبرى بعد رحلة ومشقه كبيرة علي الحاج الغير نظامي طبعاً اكتر من الحاج الرسمي وعاوز تروح علي سكنك

الحج النظامي انت معاك الباص هتتقابل في نقطه التجمع وتطلع علي السكن بتاعك معزز مكرم

الحج الغير نظامي انت هتطلع من الجمرات علي طريقين ياما بن داوود الشيشة ياما شارع صدقي وهناك الاستغلال بيلعب معاك لعبة صعبة اوي مابين انك تعبان وعاوز تروح ومابين ان اغلب التاكسي بيطلع علي الحرم فقط واقل شئ ٢٥٠ ريال الفرد وشوف انت بعد كدا سكنك فين

خلصت طواف الافاضه وعندك ٣ ايام تشريق محتاج انك تعمل الواجبات بتاعتهم علي اكمل وجه الحج النظامي هنا درجات في درجة بتوفر ليك مبيت في مني ودرجة تانيه لا بتوصلك ترمي الجمرات وترجعك للسكن والمبيت في مني فيه اكتر من فتوي وده مش قصتنا دلوقت

الحج الغير نظامي حضرتك تطلع كل يوم من السكن معرض لاستغلال التاكسي علشان ترمي الجمرات وتروح ومعظم الناس بتبات في الشوارع ايام التشريق بحجه انه واجب المبيت في مني وده بيعرضك للهلك بصراحه

ده بأختصار شديد الفرق بين الحج النظامي والحج الغير نظامي وكل واحد عارف مقدرة نفسه في شباب تقدر علي المشقه وتقدر تتصرف وفي ناس معاها فلوس تقدر انها توفر لنفسها سبل الراحه في الحج الغير نظامي وامورها تمشي كويسه نوعاً ما وفي ناس بايعه اللي حيلتها واتخدعت في شركات السياحه وطلعت معاها حج الزيارت علي اساس انه هيوفر لهم سبل الراحة

الوضع اللي شوفته لازم كل واحد يراجع نفسه كويس اوي قبل مايطلع حد مسن او صاحب مرض او حالته المادية علي قدها حج غير نظامي محدش يقدر يمنعك عن بيت ربنا بس خد احتياطاتك كويس اوي واسمع كلام ربنا ( ولا تلقوا بأيديكم الى التهلكة )

الناس ميته في الشوارع في عز الحر الناس نايمة في الشوارع مش لاقيه تاكل الناس تايهه ومن كتر اللف وقعت في الارض اللي ناسي علاجه ومش عارف يروح اللي مش معاه فلوس ولا تلفون ولا اي شئ يثبت هويته ولا حتي رقم لأهله في بلده

لازم قبل ماتطلع تكون موفر جميع سبل الطوارئ ليك او لحد من اهلك انت بتطلعه
١- فلوس بزياده اوي
٢- تلفون كويس
٣- باور بنك

خلاصة الكلام الحج لمن استطاع اليه سبيلا من حيث ( المقدرة البدنية – المقدرة المادية ) وفي الاخر كله مقدر ومكتوب بس احنا بناخد بالاسباب فقط

وكل عام وانتم بخير وترجعولنا بالف سلامة بحج مبرور وذنب مغفور وتجارة لن تبور وربنا يكتب حج البيت للجميع اعواما عديدة