جيهان الشعراوي تكتب : يوسف أيها الصديق
صدر ديوان بنت مين في مصر ٢٠٠٨.عن الهيئة العامة للكتاب كان الكل بيقول لي انتي مجنونة؟؟ حد يعمل ديوان شعر وطني .. وعامية كمان في الوقت اللي محدش اصلا عارف يعني ايه انتماء… لانهم هايكسبوا أهميته بعدين لما الدنيا توصل لمرحلة الغليان ؟
كنت باقول لهم.. ده أفضل وقت لديوان زي ده.. يمكن الناس تفكر يعني ايه الوطن!!
قصائده كلها كانت عبارة عن تنبؤات باللي حصل بعدها.. والغريبة ان القصائد .. فيها تنبؤات باللي لسه بيحصل لحد دلوقتي !!
لدرجة ان بعض زملائي وبعض المقربين افتكروا اني مخاوية
بس الحقيقة اني مش مخاوية.. انا ملبوسة بجنية اسمها مصر من وانا صغيرة.. غالبا وقعت في الضلمة على النسر اللي في العلم
——-
قصيدة “يوسف أيها الصديق”
يوسف ايها الصديق
يوسف أيها الصديق
فسر لنا منامنا
صدورنا في الحياة بتضيق
وغامصه أحلامنا
قول يا عزيز يا أمين…
إزاي نجيب قوتنا
سلبوه شوية محتالين
سقوا ربهم خمرا
اكلوا وشبعوا واغتنوا
من خير خزاينّا
والقمح بقى زرع الغريب
بالعملة بيجيلنا
طالت سنواتنا العجاف
وهزيلة بقراتنا
حتى صواع الملك
من زمان سرقوه
والكيل طفح ياما من عمايلنا
والبير … مابقاش بير أمين
حتى على عيالنا
والديب جاي بقوته
ياخد بتاره مننا
ومن باقي أجيالنا
وألف ” زليخة” كل يوم
عن روحنا تراودنا
شوف كام عزيز جم علينا
والذل كاسرنا
