تكتبها ضيا طحاوي : دور الضحية

دور الضحية مش بطولة
الوقفة ويه النفس قوة
تعلمك سر الحياة
وقت الخريف
لو حتي تاهت سكتك
الله بيرسل طوق نجاه
إياك تعيش دور الضحيه
في دنيتك

لو كنتي متعشم رضاه
إمشي علي الخط اللي راسمه
م البداية
بلاش تعاند ف الغلط
ياما عدي قبلك مليون
حكاية

لفت ودارت بالسكك
ترمي ذنوبها ع الطريق
وتلم منها اللي فضل
وتعيش بتوب الزيف
تزين في الخطايا
نفسك حاسبها وبتأني
إديها فرصة من جديد
خلي النهارده يوم تمني
في نور وجايلك مش بعيد
شفت اللي كانوا قبلنا
عاشوا وماتوا متغربين
ما بين مكابرة وإنكسار
بلاش تداري بضلنا
وتعيش تضيع في السنين
قبل الندم ما يبات بروحك
يقتلك صمت وآنين

دور الضحيه مش بطولة
الوقفة ويه النفس قوة
تعلمك سر الحياة