شيماء الغيطى تكتب : حبيب روحى
حبيب روحي
من ديوان (من ديوان قصايد مش بريئة)
كل ثانيه
وانت فيا
شمس دافيه
وروح غنيه
كل لحظه
وانت روحى
عمرى كله
ونور عينيا
قلب ابيض
نوره صابح
فوق خدود
العمر طارح
غمازات
والضحكه.ليا
حبيب روحى
ومهما انا قلت مش كافى
كلامى ده كله دين وافى
ايديه تلمس غنا كتافى
فاحس النبض فار فيا
تدوب روحى اغنيه
واطير وافرد جناحاتى
مايهزم قلبى ريح عاتى
ولا ادارى غنا وصله
سنين عمرى
يادوب تكفى
و ترخصله
دا نبض القلب من غيره
يفوت اصله
فامد ايديا من عمرى
واجيب تانى
واعطى له
يابخت النجمه
لما تزور سما ليله
يابخت الست لما تبات تغنيله
(الليل وسماه ونجومه وقمره وقمره وسهره
وانت وانا ياحبيبى انا ياحياتى انا)
فالاقى الحلم صار ليا
طريق مرسوم بحنيه
وليل عشقى اللى فيه غيه
يفيض نوره
بلمسة شوق مصفيه
واشوف روحى
بتسكن بس ف ضلوعه
وروحه ف ريحى
تحيى القلب وشموعه
يادينى عالوصال لما
يفك الشمس م المدارات
وتفتح عالجنان طاقة
ويرسم للنجوم مسارات
يادينى عالنفس منه
بيوصل ريقى بالجنه
ويفتح فيا مية طاقه
فنطلع فوق مانتمنى
وافوق م الحلم عالأحلام
وصال دايم
دفا روحه
وفجر بيشتهى الألحان
يداوى القلب وجروحه
