الشاعرة رضا عبدالوهاب : البعد دا مش فارق

وان كان البعد دا مش فارق
وبقايا الروح البقيالي
بتسيب مطارحها وبتفارق
وتروح عندك
وبصيص النور الظاهر
على عتبات الزمن الباقي المتعشق
ببواقى الغلب وبيكابر
بقى باهت من طول عِندك
العشق بيتسرسب منّا
والحزن اللى اتعدى وسارق
فتافيت العمر اللى ف لحظة
فاتنا وبيمر وبيفارق

كان اسمه ايه اللى مابنا ؟! حب ؟
الحب مش مِنة ولا صدقة تتدارى
الحب مش عِلة نداويها بمُسكن
قلبى دا كان مَسكن وحيطان وضليلة
كان الدفا ف الشتا والحضن والعيلة
أنا لن أمل البكا على ضعفى أدامك
دا انا كنت لولا الحرج لقلت …
كان قلبى خدامك يلبى ماتؤمر
كان علقمك سكر بفرت ف أشواقه
كريم وخانه الكرم وزاد أوى ف العشم
حَبك بداء الغشم والمر أهو داقه
وفُت قلبى الصبى ف عز ما احتاجك
قلبى الصغير الغبى سقيته من داءك
وذنبه لما اتكسر لَمْ بقاه وجاءك
بعترته ع السكة وفردتها دراعك
سنين بقت فكة رميتها بغباءك
وكل ذنب الهوى لدنيتي ساقك
وانا اللى لملمتك / حضنى البراح ساعك
وتقول انا مفارق / رميتنى ف مفارق دوختني ف متاهات يانخيلى ليه ساكت
هزيت ياما فروعك دوقته م الأمهات
والجمع زى الطرح معاك / خيرى مابيبانش
ياطول صبري وأنا وياك مبنطقش
بتعكز على كِتفك
وحزني ف قلبي بيعشش
ويومي ببدؤ وياك ونور الفجر بيدغشش
وتيجي طشاش ف أحلامي
أطير وأفرح
وعقلى يروح أرجع أنام / فمحلمشي
وقلبي مقطّعه بعادك
فليه تبعد .. متبعدشي / ودا كان لسان حالي

انا كل ليلة بجمّع كل الكلام عِنوة
لحنتهم غنوة .. بحبك / وحشتينى /
ياعمرى / ياحياتى / ……..
أعاتبني وبقوة صدقتى ليه قوله
يامنتهى القسوة سيبتى مشاعرك ليه
بالذوفة يروحوله
والكل اوحاله عن ضعفى وهواني
ضغط أوى ع الجرح رش بايديه الملح
عجبه انكسار روحى
وشهقة العوزة للضمة والقُبلة
حضنه اللى كان قِبلة بقى قبر لجروحى

دلوقتْ ازاى / بيعدي الوقت
من غير مانتكلم
خط الوصول بنا والله بتألم
حفظ الحروف والجمل مترتبة بشوكها
اخاف لحرف يخون يطلع كدا لغيرك
وحشِتها اشواقها حافظة خطوط سيرك غمضت انا عيوني أخدتنى اسيرك
لا عتقتنى منك ولا خدت حريتي
مسجونة وف بيتى مطعونة وبايدك
متكبلة بقيدك والله محتلة
وف راسى ميت علة وجوايا بتألم
ومكملة المشهد / كل اللى كان يشهد
على نيتي الصافية / يبقى كدا وافي / عشقى اللى ليك وافى /وملامحى اللى
مرسومة على جتتك شبابيك
وشوارعى مفتوحة تمشيها وتعديك
وكنت نيل جارى يسقى عينيك عصافير وغيطاني كات خصبة طارحة عنب فدادين سَبتني بالنظرة / وسقتنى بالتقطير
يا منتهى قوتك جبت القساوة منين يابعدها المسافات ياعشق بات متهان

Yoast