المشوار
بقلم… شيماء الغيطي
مفتتح
الكف ضم الكف
يحضن لهفته
ويمد كوبرى
للى مش طايله
والمينا قرب
م السفينه دفته
فتحت عينيه
على حلم كان شايله .
يارسمة المشوار
على كفوف الندى
الكون فضا
والغنوة لسه
مستحيلها الحلال
يا بقيه من ندهة بلال
على مدنه بيضا
شايله حمل المعجزات
ف كف قلبى
شفت ان السكه
محفوره ف خط الروح
والروح سكوت
معزوف على شوق الكلام والبوح
والخط فاصل
للحياه والموت
بيضيق خناق
الحق بالباطل
تصبح تباريح الاغانى
بوار
يا ثورة القلب البرىء
الكون ما يطرحش الفرح
من غير دموع
والموت بكائية
اغانى طيبه
فى تنوة الفنجان
بتتمايل
حروف الحلم
ويا الخوف
فتتجسد فى رؤيا جديده
محبوكة بكام تقويل
واولهم انا وانت
واخرهم انا وانت
وشوق للرحله
مدفون فى الضلوع
ملكوت
ياضلى
ياللى فضلت ساير
فى الدروب ايوب
قوام مليت من السكه
المحنيه حنايا الضهر
بدموعك
ونفسك تبتدى بكرة
من امبارح؟
بدون ماتعرى صدرك
فالميدان!
وتبدء حرب مسئولة
عن القدر اللى جاى وحده
هز الهلال ياضل
نزف السحاب بيقل
تلت الكلام اوجاع
والباقى جرح ممل
نو الشتا حاله ظالم
بيهد قلع الحنين
والمد حالم مسالم
لكنه خالى الايدين
باكى عليك ياخل
قلبك ملان بالجروح
لحظة مايشتد جرحك
رقصك حلاوه ف روح
كل السكك شايله طرحك
لما لحدود المصير
يا هاتلقى وياها فرحك
يا اما هاتموت يا طير
