منوعات

أنا آسفه :بقلم كاميليا كامل

2020/06/01 | 11:06:30

على الشوك اللى جرّحنى
وطرطش آه على جبينك
على الآهه اللى هزتنى
ف راح دمعى طرف عينك
ياريتك كنت تسألنى
وأنا عن جرحى احكى لك

مابين الورد صباره
فى ريقها مرار ولّا العلقم
وأنا طول عمرى جباره
وباخد مرّها والضُم
وأطوّل بالى ماسألش
واقول يمكن ماتقصدش
فترمي لى المرار أكثر
بألف طريقه مختلفه

أنا أسفه
على الأمس إللي سهانى
وطفّى الضى ف عيونك
على بكره إللى لو جانى
وشافنى لوحدى من غيرك
هيجلدني ميتين جلده
يا يرميني على الهامش
يسيب قلبى فى حزن كبير
وعايش بس مش عايش
يا يرمينى رزاز ف الريح
فتصلبنى دراع غيمة
بقالها 100 سنه جافه

أنا اسفه
ما أنا بنتك ووقت الخوف
بيبقى امانها احضانك
وأنا أمك واحضانها
بيبقي تملّى عنوانك
وأنا حوا اللى من ضلعك
وجودها بس علشانك
وأنا دلوقت أُدامك
ولا بحاجه لغفرانك
لكن بذنوبى معترفه
أنا أسفه

2020/06/01 | 11:06:30
زر الذهاب إلى الأعلى