الحل ايه؟!
(( الحل أيه؟؟ ))
بقلم… سلوي العيني
كل المواسم من غيرك
شبه الخريف
واليوم مخيف
من غير وجودك
جوه تكعيبة الضلوع
أشجان محاصرها الدموع
أحلام يعاشرها الخضوع
عديت في كل المعجزات
وبنيت قصور من إنجازات
ودويت جراح كل اللي فات
كل الضباب
بيغطي أفكاري بدموع
والوحدة والتفكير
بيحرقوا ف الضلوع
كل الخرايط طامسه
من خطي الرجوع
وكان قراري مستحيل
أبقي ف خضوع
صدقت أعذارك
وطويت كل اللي فات
وغفرت لك كل الحجج
وجمعت من نفسي الشتات
بس الحقيقة مؤلمة والوقت فات
ومعاه غناوي كتير قوي ومؤلفات
حتي الخرافه الساكنه عقلي
من سنين
خلتني أبني جوه مني أحلي دار
خلتني أشوف الليل بعيونك نهار
خلتني أصدق أي كلمة بإنبهار
خلتني أشوف كل الوشوش
شبهك بجد
خلتني أرفض أي حد
ينتمي لمملكتي و يشاركني فيك
وياخدني عطرك فوق
نسيم الذكريات
ينادي أسمك غصب عني
من سكات
يتلخبط السباق في قلبي
ويخلق مشكلات
وينصب فخ لمشاعري
أتوه في صراع الدوامات
أحس بجد إن في حالة ضياع
كل ما فيا رغم عني
ف حلبة صراع
كل مشاعري رايحه لك
في حالة إنصياع
كل المواسم من غيرك
شبه الخريف
والكون من غيرك مخيف
والحل أيه ؟؟
