باب الليل

باب الليل

شعر… رضا الحديدي

سك باب الليل
علي. عتمه وضلام

إقرا في كتاب الوجع
سطرين آلام

في ليل الصمت بيعيش
مخنوق الكلام

شد روحك جوه
في رحاب المنام

عايز تنام وازاي تنام
النوم رحيل…..قبل الرحيل

سيب لي من حلمك حاجات

خليني اتخبي
ف حروف قصايدك زكريات

خليني سيل دموع
يتداري فيه وجع الاهات

واحكي عني
والليل اللي كرمش
فوق جبيني غصب عني

وازاي ضحكة غروبي
تروي غصن الحلم مني

كما ضيف انا
عابر. سبيل
كان يوم فايت لي من هنا

كلمة محفوره بملامحي
قالي صالحي الكون
…… وسامحي

كما صيف انا
مشتاقه لضليله
مشتاقه لنسمة سوسنه

عدى الربيع مني إنتهي
وضل الخريف
شمس الفصول الأربعة

حكياتي تاهت في الرياح
ويا العواصف زوبعه

ولو تنام هتحلم بايه
والعمر راح للمنتهىي

ويفيد بايه
لونستحمي من الضلام

فكرك هنرجع وقتها
ندفن في الغروب صوت الدموع
والضحكه تشرق شمسها