اول تكه في البطاطا :
انا اما بشوي البطاطا في الفرن بخرمها كتيير بالشوكة علشان بتنزل العسل اللي جواها
وجربي كده اخرمي واحدة وواحدة لا وهتشوفي الفرق في الطعم
اللي بتكون مخرمة اكييد طعمها هيكون احلى
– أسرار لا تعرفيها عن الفانيليا
يا سلام عليها لو ضيفناها على اي حاجة بتخليها خيال
على العصاير خصوصا لو اي حاجة فيها لبن
بلح _ جوافة _ موز اي عصير هتحسي طعمه زي اللي بتشربيه في احلى الكافيهات
وعلى البشاميل
وعلى عجينة البيتزا طعمها بتكون ولا بيتزا هت
وممكن نضيفها على الفيشار كمان
مش بقولكوا الفانيليا دي حاجة تحفة
– تسيح السمنة
اما بسيح السمن بضيفله ورق لورى وحبهان
بيديله ريحة حلوة اوي ويتخزن لمدة سنة بنفس الريحة
– صلصة الكشري
صلصة الكشري اما بعملها وتخلص بعملها طشة توومة بكزبرة كتيير بتفرق في طعم الكشري كله
وده سر من اسرار كشري ابو طارق
– اللبن وبيكنج بودر
اما تشتري اللبن وتحسي او تشكي انه ممكن يكون رايب
او هيروب وهو بيغلي اول ماتحطيه عالنار ضيفيله معلقة بيكنج بودر كبيرة وقلبيها فيه
ان شاء الله مش هيروب خالص
– الخضروات الورقية
حفظ الخضروات الورقية زي الشبت والبقدونس والجرجير انا بغسلهم وانشفهم في فوطة نظيفة بس مش يكون فيه نقطة مية واحدة والفها في ورق ابيض نظيف مش كيس علشان الكيس بيعمل بخار مية وينزل عالخضار يسوده ويبوظه
– بواقي الكيك :
لو عندي بواقي كيك بفتته واعمله تورتة جيلي
بعمل في قالب جيلي واما يجمد بفتت عليه نص الكيك وبعدها طبقة كريم شانتي وبعد كده باقي فتافيت الكيك واصب باقي الجيلي واسيبه يبرد في التلاجة تانى
– الملوخية والكزبرة الخضراء
الملوخية انا بضيفلها كزبرة خضرا وتتخرط معاها بتكون لذيذة اوي
– تخزين الخضار والفاكهة في الفريزر
اما تخزني خضار او فاكهة في الفريزر ما تنسيش تخرجي الهوا اللي في الكيس علشان الحاجة اللي جوا ما تسودش وتفضل محتفظة بلونها
– اكلة شكلها شيك وموفرة
لو عاوزة تعملي اكلة شكلها شيك وموفرة في نفس الوقت ممكن تعملي الشيش طاووق بس بدل الفراخ تحطي بطاطس مكعبات وطعمها يجنن وشكلها جميل
– تكه بواقي رز
لو عندك بواقي رز ممكن تضيفي عليه بيضة وبهارات وتعمليها في الكبة تكوريها زي الكبيبة وتفتحيها من النص وتحشيها جبنة بزيتون وفلفل وتقليها في زيت
– لو السويسرول اتكسر او اتفتت
لو السويسرول اتكسر او اتفتت منك وانتي بتلفيه اعمليه تورتة مستطيلة اقسميها اتنين بالطول واعمليها زي ما بتعملي التورتة عادي احشيها كريم شانتي من النص وضيفي النص التاني وزوقيها على زوقك انا عملت معايا كده وقلبتها تورتة
– رز بالخلطة وعسل اسود
لو هتعملي رز بالخلطة ومكسلة تعملي الكراميل انا بضيفله معلقتين عسل اسود طعمه بيكون حلو اوي بجد
– شوربة لسان عصفور
اما بعمل شوربة لسان عصفور بحمرها واسيبها شوية علشان لو ضيفت عليها الشوربة على طول لسان العصفور بشقق كأنه مكسر
