السيسي للمصريين: تصدوا لأعداء مصر ..دورالبرلمان لازم يكون كبير..وطرح شركات القوات المسلحة فى البورصة

كتب عبد العظيم القاضي

طالب الرئيس عبدالفتاح السيسي، المصريين بالتصدي لأعداء مصر والانتباه لهم جيدا، قائلا: “لو سمحتوا اقفوا لاجل خاطر بلدكم وأحفادكم وأولادكم، اقفوا مظبوط وواجهوا مظبوط ومش لصالح حد، لاجل خاطر ربنا ولاجل خاطر ولادنا وأهلنا”.

وأضاف السيسي: ” محدش يكسر معنوياتنا وأمالنا، ويخلق حالة من الشك ويزودها، ارجو نكون منتبهين للي بيحصل في البلد كلها”.

قال الرئيس عبدالفتاح السيسي، إن الإعلام له دور كبير في المرحلة الحالية التي تمر بها مصر، “بقول إن الإعلام له دور كبير جدا.. دي حرب إعلامية وحرب شائعات ومواقع تواصل اجتماعي ضد حالة الوعي اللي بتتشكل يوم عن يوم لدى المصريين”.

وطالب السيسي الإعلاميين بالرد على الشائعات التي تستهدف التشكيك في إنجازات الدولة، “نزود ونكثف ونتكلم كتير ونتكلم بحقائق وأصول ولا نترك فرصة وفراغ لحد تاني يتكلم.. بنشوف أعداء مصر كل يوم يطرحوا مسائل بشكل عجيب جدا.. هو ده اللي بنعاني منه وده مش جديد.. التشكيك في كل شيء مرتبط بمنهج الإخوان.. كله سيئ إلا هم”.

واكد الرئيس عبدالفتاح السيسي إنّ مؤسسات الدولة دائما حاضرة في مواجهة أي شائعات، لافتا إلى أنّ نواب الشعب عليهم مسؤولية، تتمثل في التصدي لأي أمر يكون محل شك.

وتابع الرئيس: “بقولها على الهواء، تصدّوا واعملوا لجان وفتشوا واعملوا تقارير واعلنوها للناس، ولو في قصور من الدولة نعلنه، ولو العكس نوضح الحقائق للناس”.

وصف الرئيس عبدالفتاح السيسي، النائب العام بأنه “حارس وحامي الشعب المصري”، وأنّه مسؤول عن حماية الدولة لصالح الدولة وليس لصالح النظام، متابعا: “المسارات اللي كانت ماشية قبل كده، بتتماشى مع ظروفنا خلال الـ60 سنة اللي فاتت، ودلوقتي جد جديد في التطور العصري”.

وأضاف السيسي: “كل موضوع محتاج يتحقق فيه حققوا، وتصدوا للاتهامات ومش هنزعل، والمفروض منزعلش والكلام ليا وللحكومة، ما دام فيه اتهام البرلمان بلجانه يفصل، والنائب العام يفصل”.

وتابع الرئيس: “لما يتعمل استجواب لمسؤول مياخدهاش بحساسية، لازم نوضح الكلام اللي بيتقال، متسيبوش الدولة تقاتل وحدها، كل مؤسسات الدولة معنية بالدفاع عن مصر، ولازم جهودها تتضافر عشان الحقيقة، البرلمان دوره لازم يكون كبير لأن التحدي كبير”

اكد الرئيس عبدالفتاح السيسي، إن الدولة المصرية تسير في خطة طرح عدد من الشركات والأصول الحكومية في البورصة المصرية منذ 3 سنوات: “شغالين في موضوع الطرح في البورصة من 3 سنين لكن لسه منزلش الحجم المناسب”.

وأضاف الرئيس السيسي: “قولنا الطروحات اللي الدولة المصرية بتجهزها لطرحها في البورصة لا بد يكون فيه فرصة منها لشركات القوات المسلحة، لازم الشركات دي تدخل البورصة ويبقى فيه فرصة للمصريين يكون لهم أسهم في هذه الشركات، ونفتح باب المشاركة المجتمعية في هذه الشركات”.

وواصل: “القطاع الخاص مرحب بيه عايز يشارك ده متاح، وده مش كلام سياسة، أنت مش هتدخل في دراسات جدوى وتراخيص، كل ده خلصان، ننزل شركات قطاع الأعمال أو الشركات دي علشان ندي فرصة أكبر للمصريين للمشاركة”.

جاء ذلك خلال افتتاح الرئيس عبدالفتاح السيسي مشروعي مصنع الغازات الطبية والصناعية رقم 3، ومصنع فوق أكسيد الهيدروجين تركيز 50%، وهو الأول من نوعه في مصر، وتابعين لشركة النصر للكيماويات الوسيطة بمنطقة أبورواش بالجيزة.

واستمع الرئيس السيسي إلى شرح تفصيلي عن عمل مصنع الغازات الطبية والصناعية، خلال جولة تفقدية داخل المصنع، بحضور الدكتور علي عبدالعال، رئيس مجلس النواب، والدكتور مصطفى مدبولي رئيس مجلس الوزراء، وعدد من الوزراء والمسؤولين.

وأنشئت شركة النصر للكيماويات الوسيطة عام 1972، وتعد شركة النصر للكيماويات، أحد أهم قلاع مصر الوطنية، وشهدت تطورا غير مسبوق خلال السنوات الماضية، بينما يعد مصنع إنتاج غاز فوق أكسيد الهيدروجين الأول من نوعه فى مصر، ينتج 23 ألف طن سنويا، ويتم تصدير فائض إلى الخارج، كما توفر المصانع الجديدة 20 ألف فرصة عمل غير مباشرة، و4 آلاف فرصة عمل مباشرة.