د. مي جمعة تكتب :السوشيال وفجوة الاجيال
السوشيال ميديا دخلت كل بيت مصري و بقت هي الوسيط الاساسي بين افراد الاسره الواحده بدلا من الحوار المباشر واللمة اللي كانت بتجمع الكل حوالين ترابيزه واحده اصبح كل فرد قاعد في اوضه ماسك موبايله وعايش في عالم لوحده بيتابع صفحات وتريندات وفيديوهات بتتشكل بيها دماغه وبتتغير بيها نظرته للحياه وللعلاقات وللاهل نفسهم.
الاب بقى مشغول بالشغل والاخبار والاخبار الكاذبه والام بقت بتقارن بيتها ببيوت بتتشاف على الشاشه شكلها مثالي وبتحس بتقصير دايم والاولاد بقوا بيتعلموا قيم جديده من مؤثرين وبلوجرز اغلبهم مش مؤهلين للتربية ولا عارفين خصوصية المجتمع اللي عايشين فيه.
تظهر اجيال فاكره ان الحياه كلها رحلات ولبس وسفر وردود سريعة وتعليقات وتريقة وان اي مشكلة تتحل ببوست او بفيديو دقيقة.
الخطر الاكبر ان السوشيال خلقت فجوة اجيال جوه البيت الواحد الاب والام بيتكلموا لغه والولاد بيتكلموا لغه تانيه خالص لغه الميمز والتريندات والتحديات اللي ممكن توصل لاذى جسدي او نفسي وبقت الاسرار العائلية بتطلع على العام خناقه بين زوجين تتحول لمحتوى وصوره اكل تنزل استوري ومشكلة في المدرسة تتعرض على جروب عشان ناخد راي الناس وبكده ضاعت هيبه البيت وضاع مفهوم الخصوصية اللي كان بيحمي الاسرة من بره.
بقينا بنستقبل افكار غريبة عن مجتمعنا عن الجواز والطلاق والتربية والصداقة وبنصدقها لانها بتتكرر قدامنا كل يوم وبشكل جذاب ومبهر وبننسى ان ورا كل صورة فلاتر وورا كل حياه مثالية على الانترنت مشاكل حقيقية محدش بيتكلم عنها، كمان الادمان على السوشيال سرق الوقت اللي كان مخصص للقعده مع بعض بقت مفيش حوارات على العشا ولا سؤال عن اليوم ولا حضن قبل النوم بقى فيه اسكرول لا نهائي واشعارات بتقطع اي تركيز وبتعمل توتر وعصبية وبتخلي الصغير يبص للموبايل اكتر ما يبص لامه والكبير يفضل قاعد بالساعات يتفرج على مشاكل ناس ميعرفهاش وسايب مشاكل بيته متراكمه، النتيجه تفكك عاطفي وبعد وبردوة في العلاقات واطفال بتدور على القدوة في ناس غريبه مش في ابوها وامها ومراهقين بيصدقوا اي كلام منسوب لخبير نفسي او دكتور على التيك توك وبينفذوه في البيت من غير وعي.
اخطر حاجه ان السوشيال بتخلق مقارنات قاتله بتخلي الزوجة شايفه ان جوزها مقصر والزوج شايف ان مراته مش زي اللي بيشوفهم والولاد شايفين اهلهم دقه قديمة ومش فاهمينهم فبتزيد الخلافات وبيقل الرضا وبننسى نعم كتيره عندنا عشان بنبص على اللي ناقصنا عند غيرنا.
الحل مش اننا نقفل النت ولا نمنع الموبايلات الحل ان الاسره ترجع تاني تقعد مع بعض وتحط قواعد للاستخدام ويكون فيه وقت مقدس من غير شاشات ويكون الاب والام هما اول مصدر معلومات وقدوه لولادهم مش السوشيال ولازم نعلم ولادنا النقد والتفكير قبل ما يصدقوا اي حاجه بيشوفوها ونفهمهم الفرق بين الواقع وبين اللي بيتعرض على الشاشه لان البيت اللي بيقع من جوه عمر السوشيال ما هتبنيه.
د. مي جمعة تكتب :السوشيال وفجوة الاجيال
