علياء رمزي تكتب: الطلاق مش موضة
الطلاق مش موضة نطلعها في ستوري ونمسحها بعد 24 ساعه ولا كلمة بنقولها في لحظة غضب ونرجع ندور على اللي ضاع مننا بعدين الطلاق كسر في جدار بيت كان مبني طوبه طوبه على صبر وعشره ووجع وضحك وبكاء واللي بيتكسر مش بيرجع زي الاول حتى باعتذار وبوعد.
الطلاق مش حرية الطلاق وجع متأجل بيدفع تمنه اتنين الاول وبعدين يدفع تمنه الاكبر عيال صغيره كانت فاكره ان البيت امان وان السقف مش هيقع فوق راسها في يوم.
احنا بقينا بنستسهل الهجر وبنسميه استقلال وبنستسهل البعد وبنسميه كرامه وبنستسهل القطيعة وبنسميها حدود صحيه بس الحقيقة ان في فرق كبير بين انك تحط حدود وتحافظ على كرامتك وبين انك تهرب من اول مشكلة وتسيب المركب تغرق عشان خايف تتبل هدومك.
الحفاظ على الاسرة مش ضعف الحفاظ على الاسرة شجاعة، شجاعة انك تقعد وتتكلم بدل ما تسكت وتكتم شجاعة انك تعتذر وانت الكبير شجاعة انك تسمع وانت موجوع شجاعة انك تختار تكمل مش عشان مفيش بديل لكن عشان انت وعدت وعشان في اطفال شايفينك قدوه وعشان العيلة مش عقد ورق العيلة عهد.
ايوه في بيوت لازم تتقفل لما يبقى فيها اذى واهانه وخيانه وضرب بس مش كل خناقه طلاق ومش كل اختلاف طلاق ومش كل ملل طلاق، ساعات اللي ناقصنا مش شريك جديد ناقصنا صبر ناقصنا نسمع بعض للاخر ناقصنا نقول انا اسف ناقصنا نقفل الموبايل ساعه ونبص في عين بعض ناقصنا نرجع ناكل على الطبليه ونحكي زي زمان ناقصنا نرجع نلاقي وقت للضحك وسط المسؤوليات.
المجتمع اللي بيحتفل بالانفصال وبيصور الوجع هيلاقي نفسه بعد شويه عايش في شقق فاضيه وقلوب فاضيه واعياد فاضيه محدش فيها بيسأل على حد الطلاق مش نهاية وبرضو مش بداية جديده سهلة، الطلاق جرح بيفضل ينزف في العلاقات الجايه وفي العيال وفي الشارع كله.
لو تعبان اتكلم لو مخنوق اطلب مساعده لو في مشكله دور على حل قبل ما تدور على باب الخروج الجواز مش رحله كلها ورد، الجواز زرعه محتاجه ميه وصبر وتقليم وشمس واحيانا محتاجه حد يشيل عنك شويه عشان تقدر تكمل.
حافظوا على بعض مش عشان الناس ولا عشان الشكل الاجتماعي حافظوا على بعض عشان انتو اخترتو بعض في يوم وقولتو هنكمل وعشان في طفل صغير مستني بابا يرجع من الشغل ومستني ماما تحضنه قبل النوم وعشان الدنيا بره صعبه ومش ناقصه بيوت كمان تتكسر.
الطلاق مش موضة والموضة بتقدم وبتروح لكن البيت اللي فيه دفا وستر ده هو اللي بيفضل.
علياء رمزي تكتب: الطلاق مش موضة
