ابولهب وحوار ساخر مع ممدوح السباعي
ابولهب .. بسبب أفعال أهل البلينا دخلت الكورونا مصر
في ( أنا وهو )
هو : عمت مساء يا ابن السباعي
أنا : إيه هو دا ؟
ومين انت يا عم الحاج ؟
وكلام إيه اللي بتقوله ده ؟
هو : عمت مساء يا ابن السباعي ألا تسمع ؟
أنا : يا عم عمت مساء عمت صباحا إنت مين ؟
هو : أنا ابولهب
أنا : أبو مين ؟ 🤣
هو : قلت لك ابولهب
أنا : أعوذ بالله من الشيطان الرجيم
هو : ما بك يا هذا وكأنك رأيت عفريتا مثلا
أنا : امال انت إيه امام مسجد يعني ؟ 😎
هو : قلت لك ابولهب القرشي
أنا : جوز أم جميل بتاعة قريش وكدا يعني
هو : صه ولا تذكر اسم زوجتي بلسانك ولا شأن لك بها وإلا ضربت عنقك يا هذا
أنا : طيب بس بالراحة ما تزعلشي يعني إنت واخد خضرة الشريفة
دي سفاحة
المهم إنت إيه اللي جايبك عندي ؟
وعرفتني منين ؟
هو : جئتك لتدلني علي مكان مشيخة الأزهر
أنا : ههههههههههه إنت جاي تعلن اسلامك دلوك بعد ما خربتها
هو : يا هذا أنا أريد مقابلة شيخ الأزهر في أمر خطير هل ستدلني عليه أم اذهب الي حال سبيلي ؟
أنا : يا ابوالعم يا ابو عقل تخين مشيخة الأزهر في القاهرة وإنت هنا ف محافظة سوهاج وتحديدا في البلينا
هو : سمعنا عنه مش مركز البلينا دا بردوا المركز اللي سيرته علي كل لسان وسكانه يعني مش ولا بد ؟
وبسبب أفعال ” البلوانية ” جاءتكم الكورونا هاهاهاهاهاهاهاهاي
أنا : لا اوعي تستهبل وتجيب سيرة البلينا . البلينا زي الفل
بلاش تلعب ف عداد عمرك
هو : كلامك غير مفهوم يا هذا فكيف اذهب الي مشيخة الأزهر ” بناقتي ”
فقل لي كم بيننا وبين القاهرة هذه ؟
مسيرة يوم او يومين او ثلاثة ؟
أنا : هههههههههه إنت هتروح بالناقة؟
هو : أجل
أنا : يبقي قدامك مسيرة شهر او شهرين او ثلاثة دا إنت شارب حاجة باين عليك ؟
تعالي الأول روح معايا البيت خد واجبك وارتاح من المشوار وبعد كدا يسهلها ربنا
وبالمرة العيال يشوفوك وبعد كدا لو عايز تقابل السيسي اخليك تقابله
هو : ومن يكون السيسي :
أنا : دا عشيتك مربربة
دا واحد صاحبي ما تعرفهوش إنت
اسكت ما تحبسناش يا شيخ
هو : وما معني أخد واجبي ؟
أنا : طبعا إنت فاطر ؟
هو : فاطر
أنا : طيب تاخد واجبك يعني تتغدي وتشرب شاي
هو : سمعت أن سعر كيلو اللحم وصل 120 دينارا فأي طعام عندك ؟
أنا : لا ما تشيلش هم لما نوصلوا البيت هنلاقي خير ربنا كتير غير اللحمة
هو : وأين دارك ؟
أنا : بحري السوق بتاع بني حميل
هو : وأين سوق بني حميل ؟
أنا : يا بوي دا انت رطاط يعني رغاي
هو : ولماذا اغلقتم المساجد ؟
أنا : علشان الكورونا
هو : يعني هذا هو سبب غلق المساجد وأنتم في رمضان ؟
عارف انا جاي علشان اسأل شيخ الأزهر لماذا اغلقتم المساجد في شهر القرآن وصلاة التراويح
أنا : يعني انت زعلان علشان كدا ؟
هو : آه ورب الكعبة
أنا : سبحان الله
يعني انت بتاريخك اللي كله عداوة للاسلام ورسول الاسلام وما خليتش حاجة عفشة ما عملتهاش ضد المسلمين
وجاي دلوقتي تزعل علي قفل الجوامع ؟
أما عجايب والله
اقولك يا بركة كل لقمتك واشرب الشاي وروح لحالك
هو : يا هذا كف عن الكلام الغير مفهوم وإلا قاتلتك بسيفي
أنا : يا بوي سيفك إيه يا ابو سيف ؟
ياد يا عبدالرحمن هات البندقية من التلاجة اللي عندك
الله يرحمك يا ابن الخطاب كنت عامل رعب للناس دي
هو : تقصد عمر ؟
أنا : نعم
هو : معذرة يا هذا فلقد علا صوتي عليك
أنا : ولا يهمك إنت ف مطرحنا وضيفنا وبراحتك
إنما انت جاي المشوار دا كله علشان الجوامع ولا فيه حاجة تاني ؟
هو : يا هذا أنا مبعوث من قريش لمشيخة الأزهر لنبصركم بعيوبكم ونخبركم بأن افعالكم لا تليق بكم كمسلمين
فلقد كثر القتل والسكر والعربدة والسرقة والسلب والنهب والزنا والربا والقيل والقال والغيبة والنميمة
واتيتم بما لم يؤته صناديد قريش في زمانهم
ولحسن الحظ اختاروني أنا فرحبت بذلك لأني أحب مصر
أنا : طيب ولما انت زعلان علي الإسلام كان مالك بس يا ولدي عاديت رسول الله صلي الله عليه وسلم وصحابته الأطهار
كان زمانك واحد من صحابته صلي الله عليه وسلم وكل ما تبحي سيرتك نقول رضي الله عنه وأرضاه لكن انت أفقر من جدي زمان 🤣
هو : يا هذا حدث ما حدث فلا تحدثني عن الماضي
أنا : وإنت دلوك جاي عامل فيها مصلح اجتماعي ؟
مش إنت اللي كنت ليل نهار ماسك كاس الخمرة ف يدك ؟
جاي دلوك تقولي أفعال المسلمين مش عجباني وزعلان علي قفل الجوامع ؟
هو : نعم شربت الخمر المصنوع من العنب لكن دلني علي واحد من قريش شرب حشيش او واحد شم بودرة او زرع بانجو أو تعاطي شبو
يا هذا الزنا عندكم أصبح جهارا نهارا
بسبب الاختراع اللعين الذي يسمي هاتف محمول
وبسبب التلفاز
ولا اعفي نساءكم من الذنب
فهل الملابس التي تلبسها النساء في شوارعكم رأيتموها في أيام قريش ؟
القتل الذي انتشر والكره والحقد والغل
فأنا سوف أتحدث الي فضيلة الإمام في هذا الشأن لعلكم ترجعون الي رشدكم وتتبعون تعاليم دينكم الذي عاش ابن أخي ومات يدافع عنه هو وأصحابه وأنتم تاتون أفعالا لا تليق بكم
أنا : والله العظيم أنا خايف أكون باحلم
ابولهب جاي يورينا الصح من الغلط آدي اللي كان ناقص
حسبنا الله ونعم الوكيل
