نادية البسيونى تكتب برجالات “2”
![](https://elommal.com/wp-content/uploads/2020/04/IMG-20200426-WA0001.jpg)
برجالاتى برجالات
كان ميلادى بالميعاد
يومها شَمْع الدنيا قاد
والهلال بالسعد عاد
والحبايب سبَّعونى
دقوا هونى وغربلونى
وامى عدت فوق بخورى
نادى ابويا :سمَّعونى
أحلى اسم لنور عيونى
خالتى قالت بالأمانة
أحلى اسم يليق عليها
اسم بنت الصول بلال
سيرته حلوة وقلبه أبيض
زى عم الشيخ إمام
رد خالى بضحكة حلوة
أحلى اسم يليق عليها
اسم خالتى ام اشتياق
كان مزاجها الحلو رايق
بالسماحة والحياء
رد عمى وشوق ملاه
أحلى اسم يليق عليها
بنت عشرة عمر غالى
بنت جارنا الذوق هلالى
رد ابويا بقلب دافى
صوته يشبه نهر صافى
ياه عليها الذكريات
كنا نخل جذوره ثابتة
والمحبة فينا ساكنة
مهما لفت بينا ساقية
الأصالة فينا باقية
واما شمس الكون تشقشق
كان صباحنا يقوم يزقزق
ردت اختى بصوت مدقدق
حد فاكر اسم فيلم بطولته فاتن
شرط أول كلمة فيه بحروف دعاء
وبذكاء العمة قالت
واسم أمى يروح هباء
لا يا دنيا وألف لا
أمى كانت شط عامر
وبشراعها الموج يغامر
وجناحاتها ضل آمن
ياما داوت مجروحين
واما تصحى الفجر تدعى
قلب ابويا يقول آمين
كل ده وقلبى ما بينهم
فى سبات الناعسين
المهم بدون مناقشة
أمى ردت بابتسامة : نادية نادية
المهم الدنيا بيها تبقى هادية