يوسف عبدالغفار يكتب : تحية لكل عامل
بمناسبة عيد العمال أتقدم بأسمى المعانى والتحية وأرق كلمات التهاني وأطيب التبريكات لجميع العمال فى مصر عموما وفى شركة الحديد والصلب خصوصاُ ، متمنيا لهم عاما حافلا بالإنجازات و تحقيق الطموحات وكل عام والجميع بخير ، واهديهم هذه الكلمات .
كل سنة و أنا عامل
كل سنة
و أنا طيب
ولا حد فاكر
يعنى إيه عيدى
كل سنة وانا مصرى
إنسان وعصرى
وبحافظ على بلادى
لأنها الوطن
اللى بيأوينى
وبيأوى أولادى
،،،،،،،،،،،،،،،،،،،،،،،،،،،،
كل سنة وانا فلاح
وعامل فى الزراعة
وف أرضى
الارض عرض ياعواد
بالخير تجود
للى ويا الأرض بيعافر
فلاح بجهد وعرق
شوق للزرع والمية
اللى تروى عيدان القمح
زاد البلد والقوت
الفاس تبوس
إيدين الأرض تعزقها
علشان تجود
بالخير اللى يكفينا
قوت الشقيانين
والعرقانين
والى يصونوا اللقمة
بعنيهم
،،،،،،،،،،،،،،،،،،،،،،،،،،،،،،،،
كل سنة وانا عامل
والمكن داير
يشق قلب الصمت
ويدى البلد حقه
إنتاج بلدنا
بإيدينا وعرقنا
نروى حنين الذات
ونحقق الإنتاج
الخير يفيض ع البلد
إصحى ياولد
وحقق للتاريخ ذاتك
فن العمل إتقان
والنعمة اللى تتصان
ما تزولش من إيدك
مهما طال الزمااااان
حى ع الفلاح
انا عاااااامل وفلاح
ونفسى خيرى يبقى
… من أرضى
كلمات : يوسف عبدالغفار عضو اللجنة النقابية بشركة الحديد والصلب المصرية
